Bıyl jazda Pavlodar oblysynda 47 jaǵajaı jumys isteıdi

PAVLODAR. KAZINFORM — Pavlodar oblysynda sýǵa túsý maýsymyna oraı 47 jaǵajaı jasaqtalady.

Olardyń ınfraqurylymy jaqsartylyp, sýǵa túsetin jerlerge barlaý júrgiziledi.

Ashylatyn jaǵajaıdyń 27-si — kommýnaldyq, ózgesi jeke menshik. Mamandar Ertis ózeni óz arnasyna túsken soń súńgýirler sýǵa súńgip, jaǵajaılardy barlap shyǵatynyn aıtady. Sýǵa túsý maýsymy shamamen maýsym aıynyń basynda ashylýy yqtımal.

— Qazir qutqarý qyzmetteri demalýshylardyń qaýipsizdigin qamtamasyz etetin arnaıy mamandardy daıarlap jatyr. Ásirese balalardyń qaýipsizdigin qamtamasyz etý sharalaryna erekshe mán beriledi. Oblys aýmaǵynda bıyl 123 karkasty-modýldi basseın qyzmet etedi. Al sýǵa túsýge tyıym salynǵan aımaqtardaǵy eskertý belgilerine qosymsha QR-kodtar ornatylady. QR-kodtar arqyly demalýshylar jaǵajaı týraly aqparat ala alady, ıaǵnı onyń tereńdigi, qandaı da bir oqys oqıǵa bolatyn bolsa, osy aqparatta belgilenedi. Qazirgi tańda 45 QR-kod ornatylǵan, — deıdi óńirlik tótenshe jaǵdaılar departamenti azamattyq qorǵanys basqarmasynyń ofıtseri Temirlan Japalbaı.

Ótken jyly oblysta 8 adam sýǵa ketip, kóz jumǵan. Onyń bireýi bala. Tótenshe jaǵdaı mamandary qaıǵyly oqıǵalardyń aldyn alý úshin ata-analar balalaryn sý aıdyndaryna baqylaýsyz jibermeý kerek ekenin eskertedi.

Eske sala keteıik, Almatyda sýǵa túsýge bolmaıtyn 9 sý qoımasy ataldy.