Bıyl jazda Pavlodar oblysynda 45 jaǵajaı jumys isteıdi
PAVLODAR. KAZINFORM — Óńirde sýǵa túsý kezeńi resmı túrde maýsym aıynan bastalady dep kútilip otyr. Atalǵan merzimge deıin jergilikti ákimdikter jaǵajaılardy daıyndaýy tıis.
Óńirlik tótenshe jaǵdaılar departamentiniń habarlaýynsha, ózen boıynda jaǵajaılardy retke keltirý úshin Ertis óz arnasyna túsýin kútý kerek.
Al Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń málimetinshe, sý 23 mamyrǵa qaraı tolyqtaı qaıtady dep kútiledi. Osydan keıin kommýnaldyq qyzmetkerler jaǵajaıdyń jaǵalaý syzyǵyn abattandyrýmen aınalysýy kerek.
— Pavlodar oblysy ákimdiginiń qaýlysyna sáıkes, óńir aýmaǵynda sýǵa túsýge arnalǵan 45 resmı oryn belgilendi. Onyń ishinde 29-y kommýnaldyq jáne 16-sy jekemenshik. Bul jerlerde kópshilik úshin qaýipsizdik jaǵdaılary qamtamasyz etiledi. Jaǵjaılardaǵy sý túbin tekserilip, qutqarýshylardyń kezekshiligi uıymdastyrylady, — dep habarlady Pavlodar oblystyq tótenshe jaǵdaılar departamentinen.
Jaǵajaılardyń eń kóbi Baıanaýyl aýdanynda ornalasady. Munda Jasybaı men Toraıǵyr kólderiniń 9 núktesinde demalys uıymdastyrylady. Odan keıin 6 demalys orny bar Pavlodar qalasy tur, onyń ishinde ekeýi kommýnaldyq. Budan bólek, Ekibastuz, Aqsý qalalarynda, Aqtoǵaı, Ertis, Jelezın, Sharbaqty, Ýspen, Maı, Pavlodar aýdandarynda, sondaı-aq Tereńkól men Aqqýlyda bolady.
Eske sala keteıik, Qazaqstanda sýǵa uqypty qaraý mádenıeti kúsheıtilip jatyr.
Foto:
