Bıyl jazda egis alqaptaryndaǵy sý tapshylyǵy 1 mlrd tekshe metrge jetýi múmkin

ASTANA. KAZINFORM — Premer-mınıstr Oljas Bektenov Úkimet otyrysynda Ulttyq sý balansynyń kartasyn qalyptastyrýdy tapsyrdy.

— Boljamdarǵa súıensek, bıylǵy vegetatsııalyq kezeńde sý tapshylyǵy 1 mlrd tekshe metrge deıin jetýi múmkin. Sý resýrstaryn utymdy paıdalaný úshin, ásirese, aýyl sharýashylyǵynda sý únemdeý tehnologııalaryn engizý mańyzdy. Tsıfrlandyrý jáne jasandy ıntellekt jyly aıasynda sý salasyn tsıfrlandyrý jumystaryn jandandyrý qajet, — dedi Úkimet basshysy.

Sondaı-aq, ol jyl sońyna deıin jerústi jáne jerasty sý kózderi týraly derekterdi biriktiretin Sý resýrstarynyń biryńǵaı tsıfrlyq platformasyn qurýdy tapsyrdy.

— Atalǵan jobany iske asyrý Ulttyq sý balansynyń kartasyn qalyptastyryp, gıdrogeologııalyq monıtorıng júrgizýge múmkindik beredi. Sonymen qatar sýarý kanaldaryn tsıfrlandyrý jumystaryn jalǵastyrǵan jón. Bizdiń aldymyzda álemniń ozyq tájirıbelerin qoldana otyryp, qalalyq sý kanaldarynyń óndiristik protsesterin tolyq avtomattandyrý jáne tsıfrlandyrý mindeti tur. Bastapqy sý kózinen bastap sońǵy tutynýshyǵa deıin sýdy tolyq baqylaý qajet. Barlyq jumys sapaly ári ýaqtyly júrgizilýge tıis, — dedi Premer-mınıstr.

Sondaı-aq, búgingi Úkimet otyrysynda Sý resýrstary jáne ırrıgatsııa mınıstri Nurjan Nurjigitov Syrdarııadan keletin sýdyń azaıyp jatqanyn «obektıvti shyndyq» dep sıpattady.