Bıyl jaza basqan 21 sýdıa jaýapqa tartyldy

ASTANA. KAZINFORM – Qatelikke boı aldyrǵan sýdıanyń kesirinen qatardaǵy turǵyn qaltasynan qaǵylady. Biraq, olardyń saýatsyzdyǵy kóbine kózden tasa qala beredi. Nege ádildikke júginetin sońǵy ınstantsııanyń solqyldaqtyǵy elge jarııa etilmeıdi? Bul týraly Jibek joly arnasy habarlady.

Sot isterin qaraý kezinde sýdıalardyń zańdylyqty buzý jaǵdaılary jıi kezdesedi. Keıin shyǵarylǵan sheshim qaıta qaralady. Adam aqtalady.

Al, qarjy mınıstrligi salyq tóleýshilerdiń esebinen ótemaqy tóleıdi. Alaıda aqparattyq keńistikte qate ókim shyǵarǵan aqparatty kórmeımiz.

Statıstıka bar. Biraq, jaǵymsyz bolsa da Senat tóraǵasy suraǵan soń jaıyp salýǵa týra keldi. Bıyl óreskel qatelik jibergen 21 sýdıa jaýapqa tartyldy. Al, byltyr 9 sýdıaǵa osyndaı aıyp taǵylǵan.

«Mine, keri kórsetkish 9 aıda 2 jarym ese ósken. Nege olaı, taldaý jasalady. 1 qazannan jańa mehanızm boıynsha jumys júrgizile bastady. Ókinishke qaraı, búgingi jaǵdaı osy», — dedi Joǵarǵy sot keńesiniń múshesi Nurııa Sısenova.

Tártiptik jaýapkershilikke tartylǵan sýdıalar arasynda qyzmetinen ketken de, sógis alǵandar da bar. Biraq, olar súrinbeýi tıis.

Nurserik Sháripov 30 jyldan beri sot salasynda qyzmet etedi. Halyqtyq sýdıadan bastaǵan. Qazir azamattyq ister jónindegi sot alqasynyń tóraǵasy. Ózi aıtqandaı, minsiz qyzmet etýge Ata zań mindetteıdi. Prezıdenttiń tapsyrmasymen sýdıalardy tártiptik jaýapkershilikke tartý Konstıtýtsııaǵa 39-shy bap bolyp engen. Endi sýdıalar túlki bulańǵa sala almaıdy.

«Sýdıa „Men zańdy osylaı qabyldadym, zańdy osylaı túsinemin“ deıdi. Basqasha túsine almaımyn deýi múmkin. Pikirler ártúrli bolýy múmkin. Sondyqtan 39-shy baptyń ishine taıǵa tańba basqandaı jazdyryp qoıdyq. Ol — nemquraılyq, ol zańdy bilmeý. Al, eger ol burmalaý qasaqana bolsa, qylmystyq jaýapkershilik», — dedi Azamattyq ister jónindegi sot alqasynyń tóraǵasy Nurserik Sháripov.

Buryn shalys basqan sýdıanyń isi aldymen Joǵarǵy nemese oblystyq sottyń plenarlyq otyrysynda qaralatyn. Endi tikeleı sot jıýrıi qaraıdy. Bir kiltıpan sheshilgenmen, bir kúdik taǵy bar. ıAǵnı, sot jıýrıiniń quramynda 9 adam bar. Onyń 6-ýy sýdıa, bireýi advokat. Osy tulǵalar bura tartyp ketpes úshin jıýrıge qoǵamdyq múshelerdi kóptep kirgizý máselesin tez sheshken jón.