Bıyl «Jastar praktıkasy» aıasynda qandaı mamandyqtar suranysqa ıe
ASTANA. KAZINFORM — 2026 jyly «Jastar praktıkasy» jobasy sheńberinde 25 myń jas qazaqstandyqty jumyspen qamtý sharalary josparlanyp otyr, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Jastar praktıkasyna alǵan mamandyǵy (biliktiligi) boıynsha bastapqy jumys tájirıbesin jınaqtaý maqsatynda jasy 35-ten aspaǵan, bilim berý uıymdarynyń jumyssyz túlekteri qatysa alady. Baǵdarlamaǵa qatysý úshin Mansap ortalyǵyna ótinish berý qajet.
Praktıkadan ótý kezeńinde árbir qatysýshyǵa jumys berýshi tarapynan tálimger bekitiledi, ol kásibı bilim men praktıkalyq daǵdylardy meńgerýge yqpal etedi.
«Jastar praktıkasyn» qarjylandyrýdy Eńbek utqyrlyǵy ortalyǵy «Azamattarǵa arnalǵan úkimet» memlekettik korporatsııasy arqyly jalaqyny aı saıyn tóleı otyryp júzege asyrady. Tólem jumys berýshi usynǵan málimetter negizinde ekinshi deńgeıdegi bankterde ashylǵan qatysýshylardyń aǵymdaǵy (kartalyq) shottaryna aqsha qarajatyn aýdarý jolymen júrgiziledi.
— 2026 jylǵy aqpan–naýryz aılarynyń qorytyndysy boıynsha joba aıasynda 423 adam jumyspen qamtyldy. Baǵdarlamaǵa qatysýshylar jumysqa ornalasqan eń suranysqa ıe mamandyqtar qatarynda meıirger (124 adam), zańger (66 adam), shet tili muǵalimi (57 adam), tárbıeshi (47 adam) jáne bastaýysh synyp muǵalimi (43 adam) bar. Respýblıka boıynsha ortasha jalaqy mólsheri 129,7 myń teńgeni qurady, — delingen habarlamada.
Budan buryn Abaı oblysyndaǵy jumyspen qamtý bólimi 1 mlrd teńgeden astam zańbuzýshylyqtarǵa jol bergenin jazǵanbyz.
