Bıyl Japonııada sakýra gúldeý maýsymy kezeńinde saıahat arzandaýy múmkin
ASTANA. KAZINFORM — 2026 jyly Japonııada sakýra gúldeıtin maýsymǵa barý týrıster úshin aldyńǵy jyldarǵa qaraǵanda arzanyraq bolýy yqtımal, dep habarlaıdy Euronews.
Sarapshylardyń aıtýynsha, baǵanyń tómendeýine Qytaıdan keletin týrıster sanynyń azaıýy men ıenanyń álsireýi áser etken.
Japonııa Kólik mınıstrliginiń derekterine sáıkes, 2026 jylǵy qańtarda Qytaıdan kelgen týrıster sany ótken jylmen salystyrǵanda shamamen 45 paıyzǵa qysqarǵan. Qytaı áýe kompanııalary da Japonııaǵa reıster sanyn azaıtqan. Sonyń saldarynan áýe bıletteri men qonaqúı baǵalary 2025 jylmen salystyrǵanda 10–20 paıyzǵa tómendegen. Bul ásirese Kıoto men Osaka sııaqty tanymal qalalarda aıqyn baıqalady.
— Ienanyń álsireýi eýro men brıtan fýnty sekildi ózge valıýtalardyń satyp alý qabiletin arttyrady. 2026 jyly Ulybrıtanııadan keletin týrıster úshin týr baǵasy jalpy alǵanda sál arzandady, — dep málimdedi Intrepid Japan kompanııasy.
Sakýra maýsymy dástúrli túrde naýryz–sáýir aılaryna sáıkes keledi. Japonııa meteorologııalyq korporatsııasynyń boljamyna sáıkes, Tokıoda sakýranyń gúldeýi 20 naýryzda, Osakada — 24 naýryzda bastalady, al Okınavada ol qańtar–aqpan aılarynda-aq kórine bastaıdy.
Sonymen qatar týrıster jańa alymdar men salyqtardy da eskerýi tıis. 2026 jylǵy 1 naýryzdan bastap turýǵa qatysty alymdar ósedi: bıýdjettik qonaqúılerde bir túnge 200 ıenadan (shamamen 1 eýro) bastap, lıýks sanatyndaǵy qonaqúılerde 10 000 ıenaǵa (56 eýro) deıin jáne odan da joǵary bolýy múmkin. Sondaı-aq vızalyq alymdar men halyqaralyq shyǵý salyǵyn arttyrý josparlanyp otyr.
Qosymsha shyǵyndarǵa qaramastan, sarapshylar 2026 jyldy týrıstik naryqtaǵy básekeniń kúsheıýine baılanysty sakýra maýsymyna jeke jáne paket týrlar arqyly barý úshin eń tıimdi jyldardyń biri bolýy múmkin dep otyr.
Buǵan deıin Japonııa Premer-Mınıstri parlamenttiń tómengi palatasyn taratý týraly sheshim qabyldaǵanyn jazǵanbyz.