Bıyl Jambyl oblysynda balalar arasynda sýıtsıd jıilep tur

ASTANA. KAZINFORM – Jambyl oblysynda balalardyń qaýipsizdigin qamtamasyz etý jáne kámeletke tolmaǵandar arasyndaǵy sýıtsıdtiń aldyn alý sharalary kúsheıtildi, dep habarlaıdy jergilikti prokýratýra.

Jambyl oblysynyń prokýrory Nurǵalym Ábdirovtiń tóraǵalyǵymen osy másele boıynsha mekemearalyq keńes ótti.

Aǵymdaǵy jyly óńirde sýıtsıd jasaý áreketteri azaıǵanymen, aıaqtalǵan jaǵdaılardyń ósýi baıqalady. Balalar arasyndaǵy oqıǵalardyń sebepteri men jaǵdaılaryn tereń taldaý maqsatynda quqyq qorǵaý jáne jergilikti atqarýshy organdardyń birlesken buıryǵymen arnaıy jumys toby quryldy.

Bilim berý uıymdaryna bilikti mamandar men psıhologtar tartylyp, birlesken is-qımyl jospary ázirlendi. Sonymen qatar, anonımdi saýalnamalar júrgizilip, oqýshylar arasyndaǵy táýekelder týraly obektıvti derekter jınaldy.

Arnaıy top jyldyń basynan beri tirkelgen barlyq jaǵdaılardy saraptap, keıbir balalarda oıynǵa táýeldilik, basqalarynda qarym-qatynasta qıyndyqtar bolǵanyn, al birqatar oqıǵalarda sebepterdiń anyqtalmaǵanyn málimdedi.

Osyǵan baılanysty oblys prokýratýrasy ýákiletti organdarǵa kámeletke tolmaǵandardyń onlaın-oıyn bıznesine qoljetimdiligin shekteý jóninde usynys engizdi.

Psıhologtardyń jumys tásilderi de qaıta qaralyp, ortasha jáne joǵary deńgeıdegi táýekel tobyndaǵy balalardy anyqtap, olarmen profılaktıkalyq jumystar júrgizilýde.

Sondaı-aq, Baızaq aýdanynda oryn alǵan sýıtsıd jaǵdaılaryn zertteý úshin arnaıy top jumys istep jatyr.

Keńestiń qorytyndysy boıynsha naqty ındıkatorlary bar Jol kartasy qabyldandy.

Aıta keteıik, Jambyl oblysynda esirtkini zańsyz saqtap, tasymaldaǵan áke men balasy sottaldy.