Bıyl Jambyl oblysynda 1 mlrd teńgeden astam somanyń zańsyz ónimi anyqtaldy
TARAZ. KAZINFORM – Jyl basynan beri Jambyl oblysynda ekonomıkalyq quqyqbuzýshylyqtardyń birqatar deregi belgili boldy. Bul týraly óńirdegi Ekonomıkalyq tergep-tekserý departamentiniń basshysy Rýslan Qasymov málim etti.
Onyń aıtýynsha, bıyl memlekettik shekara arqyly zańsyz taýar tasymaldaý jáne kontrafaktilik alkogol men temeki ónimderiniń aınalymy boıynsha 14 qylmystyq is tirkelgen. Zańsyz ónimderdiń jalpy somasy 1,05 mıllıard teńgeni qurady. Aınalymnan 1,4 mıllıon qorap kontrafaktilik temeki men 40 myń lıtr spırt tárkilendi.
«Atalǵan qylmystar boıynsha jedel-izdestirý sharalary jalǵasyp jatyr. Kontrabandalyq arnalardy joıý – bizdiń basym baǵyttarymyzdyń biri», – dedi departament basshysy.
Sonymen qatar, júrgizilgen jedel-izdestirý is-sharalary barysynda TikTok áleýmettik jelisi arqyly uıymdastyrylǵan zańsyz oıyn bıznesi anyqtalǵan. Bul iste 26,5 mıllıon teńge kóleminde qylmystyq kiris tirkelip, Qylmystyq kodekstiń 218-baby boıynsha is sotqa joldandy.
Budan bólek, lotereıa termınaldary arqyly zańsyz qumar oıyn uıymdastyrý deregimen taǵy bir qylmystyq is tirkelip, tergeý amaldary júrgizilip jatyr.
Qasymovtyń aıtýynsha, 2025 jyldyń alǵashqy jartysynda qarjy pıramıdasyn jáne zańsyz oıyn-saýyq bıznesti uıymdastyrýǵa qatysty 6 qylmystyq is tirkelgen. Olardyń ishinde qarjy pıramıdasyn jarnamalaý faktisi de bar.
«Sońǵy úsh jylda Jambyl oblysynda qarjy pıramıdalarynan 200-den astam azamat zardap shekti. Bul – bizdiń qyzmetke resmı túrde júgingen adamdardyń naqty sany», – dedi Rýslan Qasymov.
Sondaı-aq, departament mamandary ınternet keńistikte de quqyq buzýshylyqtardyń jolyn kesýge kúsh salýda. 2025 jyldyń alty aıynda quqyqqa qaıshy kontenti bar 2 000-nan astam silteme buǵattaldy. Barlyǵynyń zańǵa sáıkes emestigi rastaldy.
Sonymen qatar, «Kúndelikti tabys» jáne «Jumys toby» atty eki WhatsApp chaty anyqtalyp, jabyldy. Bul toptarda 792 adam tirkelgeni belgili boldy.
Aıta keteıik, Jambyl oblysynda memleketten zańsyz 321 mln teńge sýbsıdııa alǵan basshylar sottaldy.