Bıyl jalpy quny 1,3 trln teńge bolatyn 180 joba iske qosylady
ASTANA. KAZINFORM – Bıylǵy jobalar pýlynda 1,3 trln teńgeni quraıtyn 180 joba bar. Bul týraly Úkimet otyrysynda Ónerkásip jáne qurylys mınıstri Qanat Sharlapaev aıtty.
«Bıylǵy jobalar pýlynda 1,3 trln teńgeni quraıtyn 180 joba bar. Bul jobalar iske qosylǵanda, 15 myńnan astam turaqty jumys orny ashylady. Jyl basynan beri 158 mlrd teńgege 43 joba iske qosylyp, eki myńdaı jumys orny ashyldy», - dedi mınıstr.
Qanat Sharlapaevtyń dereginshe, iske qosylǵan jobalardyń qatarynda Mańǵystaý oblysyndaǵy KazAzot ammonıı sýlfati, Qyzylorda oblysyndaǵy Orda Glass energııa únemdeıtin shyny, Batys Qazaqstan oblysyndaǵy Kaspı Munaı Kapıtal munaı gaz jabdyqtar óndiristeri bar. Bul jobalardyń negizgi maqsaty – ımportty almastyrý.
«Sonymen qatar, jyl sońyna deıin Shymkent qalasynda Wan Sheng Ceramic keramıkalyq plıtkalar óndirisi, Qostanaı oblysynda KamLitKZ júk avtomobılder komponentteriniń óndirisi, Qostanaı oblysynda Prýjına temirjol vagondaryna arnalǵan prýjınalar óndirisin iske qosý kózdelgen», - dedi ol.
