Bıyl jalpy egis alańy shamamen 23,8 mln gektar boldy
ASTANA. KAZINFORM — Osy jyly bıdaı egiletin alań 125 myń gektarǵa qysqartylady. Bul týraly Úkimet otyrysynda Aýyl sharýashylyǵy mınıstri Aıdarbek Saparov málim etti.
— Mınıstrlik oblys ákimdikterimen birlesip 2026 jylǵa egis alqaptarynyń boljamdy qurylymyn bekitti. Bul qurylym — bıdaı alqaptaryn qysqartý jáne joǵary rentabeldi daqyldardy ulǵaıtý boıynsha ártaraptandyrýǵa baǵyttalǵan. Bıyl jalpy egis alańy shamamen 23,8 mln gektar, bul ótken jyldan 180 myń gektarǵa kóp. Sonyń ishinde maıly daqyldar alańy 55 myń gektarǵa, azyqtyq daqyldar 242 myń gektarǵa, arpa 94 myń gektarǵa, al uıymdastyrylǵan sharýashylyqtarda kartop alańy 10,3 myń gektarǵa kóbeıedi, — dedi Aıdarbek Saparov.
Bul rette, bıdaı alańy 125 myń gektarǵa qysqartylyp, 12,1 mln ga boldy. Sonymen qatar, júgerini tereń óńdeıtin ınvestıtsııalyq jobalardy shıkizat bazasymen qamtamasyz etý boıynsha jumys júrip jatyr. Osyǵan baılanysty júgeri boıynsha ártaraptandyrý ındıkatorlaryn qaıta qarap, onyń egis alqaptaryn keńeıtýdi josparlanǵan.
— Bıyl júgeri alqabyn 265 myń gektarǵa jetkizý josparlanǵan, bul ótken jyldan 90 myń gektarǵa kóp (174,6 myń ga). Osy maqsatta Mınıstrlik Qytaıdyń soltústik óńirlerinde bizge uqsas topyraq-klımattyq jaǵdaılarda júgeri ósiretin kompanııamen kezdesý ótkizdi. Bul kompanııa tuqym, tyńaıtqysh jetkizý jáne ósirý tájirıbesimen bólisý arqyly praktıkalyq qoldaý kórsetýge daıyn ekenin bildirdi. Sonymen qatar, qazirgi ýaqytta kásiporyndy júkteý maqsatynda Azyq-túlik korporatsııasy arqyly sharýalardy forvardtyq qarjylandyrý jáne keıinnen júgerini ınvestorǵa ótkizý múmkindigi pysyqtalyp jatyr. Osyǵan baılanysty ákimdikterdi júgeri ósirý boıynsha halyqaralyq tájirıbeni qabyldap, onyń egis alqaptaryn keńeıtý baǵytyndaǵy jumysty jandandyrýdy suraımyz, — dedi mınıstr.
Aıtıa keteıik, buǵan deıin Úkimet kóktemgi egis jumystaryna daıyndyq barysyn pysyqtaıtynyn jazǵan edik.