Bıyl ýtılalymnan el qazynasyna 324 mlrd teńge tústi
ASTANA. KAZINFORM – Kádege jaratý tólemderinen túsken qarajat Ekologııa kodeksiniń 388-babyna sáıkes qatań túrde maqsatty baǵyttar boıynsha jumsalady. Atalǵan bapta qarajatty paıdalaný tetikteri men naqty baǵyttary aıqyn belgilengen.
– 2025 jyldyń 11 aıynyń qorytyndysy boıynsha ýtılalym tólemderinen túsken jalpy túsim 324 mlrd teńgeni qurady. Onyń ishinde kólik quraldaryn, aýyl sharýashylyǵy tehnıkasy men avtokomponentterdi óndirýshilerden shamamen 133,3 mlrd teńge tústi. Al ımporttaýshylardan túsken qarajat kólemi 172,8 mlrd teńgeni qurady, – dedi «Jasyl damý» AQ basqarma tóraǵasynyń orynbasary Nurjan Qabdoldanov Ortalyq kommýnıkatsııalar qyzmetinde ótken brıfıngte.
Sonymen qatar onyń málimetinshe, tehnıka men avtokomponentterdi otandyq óndirýshilerge 140,9 mlrd teńgeden astam qarajat qaıtarylǵan. Qazirgi tańda shyǵystar men túsimder arasyndaǵy 7,6 mlrd teńge aıyrmasy jańa markaly kólik quraldary boıynsha óndirýshilermen kelisimsharttar jasasý kezeńinde tur. Al avtokomponentter boıynsha qaıtarymǵa ótinimder túspegen.
– Úkimettiń №604 qaýlysy aıasynda qaıtarymdy negizde qarjylandyrylatyn jobalarǵa shamamen 125 mlrd teńge baǵyttaldy. Bul qarajat turmystyq qatty qaldyqtar salasyndaǵy jobalardy iske asyrýǵa, órtterdi erte anyqtaý júıelerin satyp alýǵa, sondaı-aq ekologııalyq kataklızmderdiń aldyn alý jáne saldaryn joıý úshin arnaıy tehnıka alýǵa jumsaldy, – dep tolyqtyrdy «Jasyl damý» AQ ókili.
Buǵan deıin turmystyq qatty qaldyqtar polıgony ýtılızatsııalyq alymdar esebinen salynýy múmkin ekenin jazǵanbyz.