Bıyl úsh aıda balalardyń terezeden qulaýyna qatysty 44 jaǵdaı tirkeldi
ASTANA. KAZINFORM – Ulttyq shuǵyl medıtsınany úılestirý ortalyǵynyń málimetteri boıynsha, 2026 jyldyń alǵashqy úsh aıynda Qazaqstanda balalardyń terezeden nemese bıiktikten qulaýymen baılanysty 44 oqıǵa tirkelgen, onyń ishinde 4 jaǵdaı ólimmen aıaqtalǵan. Bul týraly Densaýlyq saqtaý mınıstrligi habarlady.
Eń kóp jazataıym oqıǵalar Atyraý oblysynda – 13, Astana qalasynda – 8 (onyń ishinde 3 ólim), sondaı-aq Mańǵystaý oblysynda – 4 (onyń ishinde 1 ólim) tirkelgen.
Qaıǵyly jaǵdaılar kóbinese erte jastaǵy jáne mektepke deıingi balalar arasynda bolǵan. Bul jas toptary qaýip-qaterdi tolyq túsine almaıdy. Sondyqtan eresekterdiń balalarǵa qysqa ýaqyt bolsa da nazar aýdarmaýy aýyr saldarǵa ákelýi múmkin.
Jazataıym oqıǵalardyń negizgi sebepteri mynalar:
- balalardy qaraýsyz qaldyrý;
- jaýapkershilikti úlken balalarǵa júkteý;
- terezelerde qorǵanysh qurylǵylarynyń bolmaýy;
- tereze mańynda balanyń ózdiginen shyǵýyna múmkindik beretin jıhazdyń ornalasýy;
- moskıt torlaryn qaýipsizdik quraly retinde qate qabyldaý.
Moskıt torlary tek jándikterden qorǵaýǵa arnalǵan jáne balanyń salmaǵyn kótere almaıdy. Az ǵana qysym túskende olar balamen birge qulap ketýi múmkin, bul eresekterde jalǵan qaýipsizdik sezimin týdyrady.
Osy oqıǵalardyń aldyn alý maqsatynda ata-analar men zańdy ókilderge kelesi sharalardy ustaný usynylady:
- balalardy, ásirese ashyq terezesi bar bólmede, qaraýsyz qaldyrmaý;
- arnaıy qorǵanysh qurylǵylaryn (ashylýyn shektegishter, blokıratorlar, balalar qulyptary) ornatý;
- tereze mańyna jıhaz ornalastyrmaý;
- balany únemi baqylaýda ustaý;
- balalarǵa qaýipsizdik erejelerin túsindirý;
- qaýipsiz jeldetý fýnktsııasy bar terezelerdi paıdalaný;
- tereze qurylymdary men bekitpeleriniń senimdiligin tekserý.
Arnaıy nazar kópbalaly otbasylarǵa jáne balalardy qart týystar nemese kámeletke tolmaǵandar qaraýynda qalatyn jaǵdaılarǵa aýdarylýy tıis, sebebi bul jaǵdaıda ata-analardyń júktemesi joǵary bolady.
Eske sala keteıik, buǵan deıin Petropavlda úsh jasar bala terezeden qulap ketkenin jazǵanbyz.
