Bıyl ýnıversıtetterdiń birinshi kýrsyna 140 myńnan astam stýdent barady

ASTANA. KAZINFORM — Osy jyldyń sońynda jınaqtaýshy «Keleshek» baǵdarlamasy da iske qosylady. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málim etti.

«Bıyl mektepti 188 000 astam túlek bitirdi. Olardyń 140 myńnan astamy joǵary oqý oryndaryna birinshi kýrsqa kelýi múmkin. Osylaısha, osy oqý jylyndaǵy stýdentterdiń jalpy sany 650 myńǵa jýyq adamdy quraıdy. Ózderińiz kórip otyrǵandaı, 2020 jyldan bastap mektep túlekteriniń sany jyl saıyn ulǵaıyp keledi. Sondyqtan biz grant sanyn kóbeıttik», — dedi Saıasat Nurbek.

Bul turǵyda ol qosymsha joǵary bilimniń qoljetimdiligin arttyrý tetikteri bar ekenin aıtty. Atap aıtqanda, dıfferentsıaldy granttar, jeńildetilgen kredıtter, «Ulttyq qor — balalarǵa» jáne «Keleshek» baǵdarlamasy eskerilgen.

«Bıyl Ulttyq qor — balalarǵa» júıesi iske qosyldy. Ár balaǵa arnaıy esep-shot ashyldy. Osy jyldyń sońynda jınaqtaýshy «Keleshek» baǵdarlamasy da iske qosylady. Qazir tıisti zańnamalyq ózgerister Parlament Májilisiniń qaraýynda jatyr», — dedi mınıstr.

Vedomstvo málimetine qaraǵanda, qazirgi kezde elimizde 120 joǵary oqý orny jumys istep jatyr (11 ulttyq, 29 memlekettik, 14 azamattyq emes, 1 derbes bilim berý uıymy, 1 halyqaralyq, 16 aktsıonerlik jáne 48 jekemenshik).