Bıyl 10 jańa fılm prokatqa shyǵady — Ulttyq kıno ortalyǵy

ASTANA. KAZINFORM — Bul fılmderde jas urpaqtyń tárbıesine oń yqpal etetin, kórermenge oı salatyn qundy ıdeıalar kórinis tabady, dep habarlaıdy Ulttyq kıno ortalyǵy.

кино
Фото: Ұлттық киноны қолдау орталығы

Olardyń qatarynda 2011 jyly Tarazdaǵy teraktide qaza tapqan Ǵazız Baıtasovqa arnalǵan «Kapıtan Baıtasov» kınokartınasy bar. Sonymen birge lýdomanııa taqyrybyn qozǵaıtyn «Igromanka» jobasy da qoǵamnyń keselin ashyp kórsetedi. Al «90+1» fılmi jastardyń salaýatty ómir saltyn ustanýǵa jáne sportqa degen qulshynysyn oıatady. Budan bólek, «Osennıı brız», «Feıkovyı arman», «Qaitadan», «Tezek», «Qara qyz», «Altyn adam», «Aromatnoe serdtse» jáne «Ábil» fılmderi kınoteatrlarda usynylady.

— Kıno — jaı ǵana óner emes, ulttyq ıdeologııany qalyptastyratyn quraldyń biri. Memleket qarjysyna túsirilgen kınoda, eń aldymen, qoǵamǵa qajetti qundylyqtar dáriptelýi tıis. Buǵan deıin Prezıdent Qasym-Jomart Toqaev ta kınoındýstrııany mádenıettiń bir bóligi ǵana emes, ekonomıkanyń jeke tarmaǵy retinde qarastyrýdy tapsyrdy. Kınony damytý úshin jańasha kózqaras, tyń serpin qajettigin alǵa tartty. Túsirilim barysynda osy dúnıelerdiń barlyǵy eskerildi. Qolǵa alynǵan jobalar kórermen kóńilinen shyǵady degen oıdamyz, — deıdi Ulttyq kınony qoldaý ortalyǵynyń Basqarma tóraǵasy Qurmanbek Jumaǵalı.

Kıno ortalyǵy naýryz aıynyń basynda jańa kınojobalar konkýrsy jarııalanatynyn da habarlaıdy. Bıyl fılm túsirýge arnalǵan basym taqyryptar legi jarııalandy. Onyń ishinde eń aldymen Otanǵa degen súıispenshilik, tarıh, taǵylym, bilim, otbasy sekildi mańyzdy taqyryptar qamtylǵan. Buǵan qosa jumysshy mamandyqtary men eńbek adamdarynyń erligi de basym taqyryptar qatarynda. Tolyqqandy tizim Kıno ortalyǵynyń resmı saıtynda qoljetimdi.

Aıta ketý kerek, ótken jyly memlekettik qoldaýǵa úmitker kınojobalardy irikteý erejesine ózgerister engizilgen bolatyn. Jańa erejege sáıkes, konkýrstyń birinshi kezeńinde áýeli stsenarııler qabyldanyp, úzdikteri saraptama keńesiniń qaraýyna jiberiledi. Búgingi eseppen qarasaq, kınogerler úshin stsenarıı jazý, tolymdy oı qorytýǵa 2 aı kóleminde ýaqyt berilip otyr.

Buǵan deıin qazaqstandyq «Shatyrdaǵy ekeý» fılmi Úndistandaǵy kınofestıvalde jeńimpaz atanǵanyn jazdyq.

Сейчас читают