Bıyl Ulttyq bank depozıt mólsherlemelerin retteý saıasatyn jetildiredi

ASTANA. KAZINFORM — Ulttyq bank tóraǵasy Tımýr Súleımenov Úkimettiń keńeıtilgen otyrysynda depozıt naryǵynyń ahýalyna toqtaldy.

— Júrgizilip jatqan aqsha-kredıt saıasaty teńgedegi aktıvterge degen senimdi saqtaýda. Depozıtter 16,3 protsenttiń ósim kórsetip, 48 trln teńgege jetti. Dollarlaný deńgeıi 21 protsent bolyp, tarıhı mınımýmda qalyptasty, — dedi Ulttyq bank basshysy. 

Sondaı-aq, ol merzimdi depozıtterdiń kólemi 14 ese, al jınaq depozıtter 1,5 ese óskenin atap ótti.

— Osy depozıtter bankterdiń ekonomıkany kredıtteýine turaqty qarjylandyrý bazasyn ulǵaıtady. Bıyl depozıt naryǵyndaǵy mólsherlemelerdi retteýdi jetildiremiz. Bul bankter arasyndaǵy básekelestikti arttyrýǵa jáne qarjylyq qyzmetterdiń sapasyn jaqsartýǵa yqpal etedi, — dedi Tımýr Súleımenov.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.