Bıyl UBT qalaı ótedi
ASTANA. KAZINFORM – Bıyl Ulttyq biryńǵaı testileý elimizdiń ár aımaǵynda ártúrli ýaqytta bastalady.
«Tótenshe jaǵdaı rejımi jarııalanǵan 6 oblys talapkerleri úshin UBT keıinirek bastalady. Atap aıtqanda, Aqmola, Aqtóbe, Atyraý, Batys Qazaqstan, Qostanaı jáne Soltústik Qazaqstan oblystary úshin UBT-ǵa tirkelý 6 mamyrdan 20 mamyrǵa deıin, al testileý 25 mamyr men 12 shilde aralyǵynda ótedi», - degen aqparat taratty Ǵylym jáne joǵary bilim mınıstrligi.
Qalǵan óńirdiń talapkerleri úshin UBT-ǵa ótinishterdi qabyldaý merzimi - 6 mamyrdan 14 mamyrǵa deıin. Al UBT 16 mamyrda bastalyp, 5 shildege deıin jalǵasady.
Sondaı-aq, mınıstrlik 2024 jyly barlyq talapker Ulttyq biryńǵaı testileýdi eki ret tapsyryp, úzdik nátıjemen grant konkýrsyna qatysa alatyndyǵyn habarlap otyr.
