Bıyl tústi metallýrgııa salasynda segiz jobany iske asyrý josparlanǵan
ASTANA. KAZINFORM - Tústi metallýrgııa – Qazaqstan ónerkásibindegi jetekshi salalardyń biri. Bul baǵyttyń tabysty damýyna elimizdiń baı shıkizattyq bazasynyń bolýy yqpal etip otyr, dep habarlaıdy QR Ónerkásip jáne qurylys mınıstrliginiń baspasóz qyzmeti.
Qazaqstan aýmaǵynda mys, myrysh, nıkel, qorǵasyn, alıýmınıı jáne baǵaly metaldardyń iri ken oryndary shoǵyrlanǵan.
Bıyl salada jalpy kólemi shamamen 80,1 mlrd teńge ınvestıtsııa tartý arqyly 8 jobany iske qosý josparlanyp otyr. Bul jobalar júzege asyrylsa 1,5 myńnan astam turaqty jumys orny ashylmaq. Bul týraly «QazIndustry» qazaqstandyq ındýstrııa jáne eksport ortalyǵynyń Jobalardy monıtorıngteý jáne taldaý dırektsııasy habarlady.
Atap aıtqanda, katodty mys, mys symy, mys kabeli, alıýmınıı untaǵy jáne legırlenbegen alıýmınııden quıylǵan shybyq óndiristerin iske qosý kózdelgen. Qazirgi tańda bir joba óndiristik paıdalanýǵa berildi: Qaraǵandy oblysynda katodty mys óndirý iske qosyldy. Jobany júzege asyrýǵa 8 mlrd teńge ınvestıtsııa tartylyp, 512 turaqty jumys orny ashyldy.
- Budan bólek, tústi metallýrgııa salasynda Dore qorytpasyn, alıýmınıı bılletteri men profılderin óndirýge baǵyttalǵan alty joba qazirgi ýaqytta iske asyrylý kezeńinde tur. Atalǵan jobalardyń paıdalanýǵa berilýi 2027-2028 jyldarǵa josparlanǵan. Jobalarǵa tartylǵan jalpy ınvestıtsııa kólemi 532,1 mlrd teńgeden asady. Bul bastamalar 800-den astam jańa jumys ornyn ashýǵa múmkindik beredi, sonyń ishinde shamamen 140 jumys orny aýyldyq eldi mekenderde ashylmaq, – delingen habarlamada.
Sonymen qatar, qazirgi ýaqytta Dore quımasyndaǵy altyn men kúmis, nıkel shteıni, legırlenbegen alıýmınıı, volfram, qorǵasyn jáne myrysh óndirý boıynsha taǵy 34 joba pysyqtalý satysynda. Atalǵan jobalar boıynsha josparlanǵan ınvestıtsııa kólemi 6,9 trln teńgeni quraıdy, boljam boıynsha, bul jobalar 17,1 myńǵa jýyq jańa jumys ornyn qurýǵa múmkindik beredi.
- Jalpy alǵanda, qazirgi jáne aldaǵy ýaqyttaǵy josparlanǵan 48 joba aıasynda shamamen 7,5 trln teńge kóleminde ınvestıtsııa tartý kózdelip otyr. Nátıjesinde jalpy 19,4 myń jańa jumys orny ashylady dep kútilýde, onyń 15,7 myńy aýyldyq jerlerge tıesili bolmaq, - delingen habarlamada.
Aıta keteıik, tústi metallýrgııa ónimderin óndirýge baǵyttalǵan iri jobalardy Qostanaı, Pavlodar, Qaraǵandy, Abaı oblystarynda iske asyrý josparlanǵan.
Aıta keteıik, osyǵan deıin saapshylar metaldardy qaıta óńdeý Qazaqstan ekonomıkasy ósiminiń negizine aınalatyny týraly aıtqan edi.
