Bıyl turmystyq zorlyq-zombylyq jasaǵan 4500-ge jýyq ózbekstandyq jaýapqa tartyldy

TAShKENT. KAZINFORM – Ústimizdegi jyldyń alǵashqy toqsanynda Ózbekstanda turmystyq zorlyq-zombylyq áreketterin jasaǵan 4 477 adam ákimshilik jáne qylmystyq jaýapkershilikke tartyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Joǵary sotynyń baspasóz hatshysy Azız Abıdov málim etkendeı, Ákimshilik jaýapkershilik týraly kodekstiń turmystyq zorlyq-zombylyq baby boıynsha 4 343 adam jaýapqa tartyldy. Olardyń ishinde 2 344-ne aıyppul salynsa, 1 999-y ákimshilik qamaýǵa alynǵan.

Al Qylmystyq kodekstiń 126-1-baby boıynsha (Qaıtalap jasalǵan nemese aýyrlatatyn mán-jaıy bar turmystyq zorlyq-zombylyq) 134 adam sottaldy. Onyń 51-i bas bostandyǵynan aıyryldy, al 83 adamǵa ózge de jaza taǵaıyndalǵan.

Aıta keteıik, joǵaryda atalǵan baptar Ózbekstan zańnamasyna 2023 jyldyń sáýirinde engizildi. Ótken jyly olar boıynsha 9 131 adam jaýapqa tartylǵan.