Bıyl túrkistandyq dıqandar sýdan tapshylyq kórmeıdi

TÚRKІSTAN. KAZINFORM – Bıyl túrkistandyq dıqandar sýarmaly sýdyń tapshylyǵyn kórmeıdi. Bul týraly «Qazsýshar» RMK Túrkistan fılıalynyń dırektory Qazybek Bedebaev málimdedi.

Túrkistan oblysy boıynsha jalpy kólemi 552 myń ga sýarmaly jer bar. Onyń ishinde 332,0 myń ga egistik alqaby «Qazsýshar» RMK Túrkistan fılıaly arqyly aǵyn sýmen qamtamasyz etiledi. Bıyl atalǵan mekeme egistikke arnalǵan sýarmaly sýdyń baǵasyn 30 paıyzǵa qambattatty. ıAǵnı, dıqandar 1 tekshe metr sý úshin 1 teńge 70 tıynnan tólep keledi.

«Buryn egistikke sýdy ortadaǵy aýyl sharýashylyq kooperatıvteri arqyly jetkizetinbiz. Bıyldan bastap dıqandarǵa qolaıly jaǵdaı jasaý maqsatynda tikeleı ózimiz jetkizip berýdemiz. Ortadaǵy artyq tólemder alynyp tastaldy. Bul halyqqa tıimdi bolyp otyr» - dedi Qazybek Bedebaev.

Spıkerdiń sózine súıensek, sharýalar bıyl sýdyń tapshylyǵyn kórmeýi kerek. Sebebi, tıisti mınıstrlikter tarapynan kórshiles elderden keletin sýarmaly sý boıynsha kelissózder júrgizilgen. Sondaı-aq, arnalarda júrgizilgen mehanıkalyq tazalaý jumystarynyń nátıjesinde egistik alqaptaryna aǵyn sý jetkizý múmkindigi artqan.

«Bizde kóbinese transshekaralyq kanaldar arqyly keletin sýdan másele týyndaıtyn. Mınıstrlik tarapynan kóptegen jaǵdaılar sheshimin taýyp jatyr. Qazir aýa – raıy da qolaıly bolyp tur. Egerde fors-majorlyq jaǵdaı bolyp qalmasa, dıqandar sý tapshylyǵyn sezinbeıdi» - dedi Qazybek Bedebaev.