Bıyl Túrkistan oblysynda órtten 18 adam qaıtys bolyp, 13 adam jaraqattanǵan

TÚRKІSTAN. KAZINFORM – Bıyl oblys aýmaǵynda 390 órt oqıǵasy tirkelgen. Tilsiz jaýdan 18 adam qaıtys bolyp, 13 adam jaraqattanǵan. Bul týraly Túrkistan oblysy TJD Memlekettik órt baqylaý basqarmasy bastyǵynyń mindetin atqarýshy Jasulan Aınabek málim etti.

Departament ókiliniń málimdeýinshe, oblys aýmaǵyndaǵy órttiń basym bóligi turǵyn úı sektorynda, avtokólik quraldarynda, saýda oryndarynda, bıdaı jáne orman alqaptarynda bolǵan.

– Jyl basynan beri órtten bolǵan materıaldyq shyǵyn kólemi – 1 mıllıard 729 mıllıon teńge. Sondaı-aq, gazdan ýlaný deregi boıynsha 1 jaǵdaı tirkelgen. Oqıǵa saldarynan 2 adam qaıtys bolyp, 3 adam jaraqattanǵan. Jergilikti ákimdikter tarapynan áleýmettik jaǵdaıy tómen otbasylardyń murjalary tazartyldy. Ataýly is-sharaǵa tótenshe jaǵdaılar qyzmetkerleri, jergilikti atqarýshy organdar, gaz ınspektsııasynyń mamandary qatysty. Oblys kóleminde júrgizilgen reıd nátıjesinde TJD qyzmetkerleri 37 myńnan astam zańbuzýshylyqtardy anyqtady, – dedi ol.

Jasulan Aınabektiń aıtýynsha, jylytý maýsymynda peshterdi tazalaý jumystary keminde 3 aıda bir ret júrgizilýi tıis. Tútin arnalary ótetin peshter, qubyrlar men qabyrǵalardyń betteri aqaýsyz, jaryqsyz bolýy mindetti. Peshten alynǵan kúl men ot qaldyǵyna sý quıyp, ǵımarattardan keminde 15 metr qashyqtyqta ornalasqan jerge aparyp tastaý qajet.

Budan buryn Túrkistan qalasyndaǵy munaı bazasynan órt shyqqanyn jazǵan edik.