Bıyl Túrkistan oblysynan 4 500-ge jýyq azamat áskerge attandy

Túrkistan oblysynda  kúzgi áskerge shaqyrý naýqany aıasynda jastardy  QR Qarýly kúshteri qataryna saltanatty shyǵaryp salý rásimi ótti, dep habarlaıdy Kazinform.

Jańa jyl qarsańynda Otan aldyndaǵy boryshyn óteýge 45 jigit áskerge attandy. Atalǵan sharaǵa Túrkistan oblysy ákiminiń orynbasary Beısen Tájibaev qatysyp, jastarǵa aq jol tilep, izgi nıetin jetkizdi.

«Bıyl Túrkistan oblysy ákimdiginiń qaýlysy negizinde ásker qataryna 4 500-ge jýyq er-azamatty shaqyrý josparlanǵan. Sonyń ishinde kóktemgi jáne kúzgi naýqanda shaqyrý jospary artyǵymen oryndalyp otyr. Ýaqyt almasady, urpaqtar ózgeredi. Biraq Otanǵa súıispenshilik, qajyrlylyq, erlik, jaýyngerlik rýhymyz ózgerissiz qalady», – dedi Beısen Tájibaev.

Jalpy bıyl óńirden Ulttyq qaýipsizdik komıtetiniń shekara qyzmetine – 610, Memlekettik kúzet qyzmetine – 44, Qarýly kúshterine – 1 869, Tótenshe jaǵdaılar áskerlerine – 81, «Ulttyq ulanǵa» 1 729 azamat jiberildi.

Jóneltý aldynda áskerge shaqyrylýshylar medıtsınalyq komıssııadan, psıhologııalyq testileýden, kásibı irikteýden ótti.