Bıyl tsıfrlyq aktıvter salasynda naqty jobalar iske asyrylady

ASTANA. KAZINFORM – Bıyl tsıfrlyq aktıvter salasynda naqty jobalar iske asyrylady. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.

- Krıptoındýstrııany damytýǵa Úkimet pen Ulttyq bank tarapynan kóbirek kóńil bólinýde. Qazirdiń ózinde tsıfrlyq aktıvter salasyndaǵy zańnamany jetildirý boıynsha aýqymdy jumys júrgizildi. El aýmaǵyndaǵy krıptovalıýta aınalymyn zańdastyrýǵa jáne tsıfrlyq maınıng ındýstrııasyna ınvestıtsııalar tartýǵa baǵyttalǵan túzetýler qabyldandy. Bıyl osy ınnovatsııalyq salada naqty jobalardy iske asyrý josparlanýda, - dedi Jaslan Mádıev.

Onyń aıtýynsha, Qazaqstan venchýrlyq mámileler boıynsha óńirdegi kóshbasshy sanalady. 

- Elimiz barlyq mámilelerdiń shamamen 75 paıyz úlesine ıe. Alaıda, eldegi venchýrlyq operatsııalardyń 90 paıyzy startaptardyń alǵashqy kezeńderine baǵyttalǵan. Júrgizilgen zertteýge sáıkes 2 myńǵa jýyq amerıkalyq kompanııanyń jartysyna Unicorn kompanııa mártebesine jetý úshin 3-ten 6-ǵa deıin qarjylandyrý raýndy qajet bolǵan, - dedi ol.

Buǵan deıin Premer-mınıstr Oljas Bektenov «Digital Qazaqstan» strategııasyn ázirleýdi jedeldetýdi tapsyrǵanyn jazǵan edik.