Bıyl transshekaralyq sý resýrstarynyń spýtnıktik derekterimen almasý platformasy iske qosylady
ASTANA. KAZINFORM — Bıyl transshekaralyq sý resýrstarynyń spýtnıktik derekterimen almasý platformasy iske qosylady. Bul týraly búgin Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Madıev aıtty.
— NeoPro sý arnasyn basqarýdyń biryńǵaı platformasy erekshe nazar aýdarýǵa turarlyqtaı. Platforma kóptegen modýlderdi qamtıdy jáne baqylaý men dıspetcherleýdi, tsıfrlyq egizdi, apattyq baqylaýdy, túbirtekterdi avtomattandyrýdy jáne ótinimderdi basqarýdy qamtamasyz etedi. Sheshim Shymkent qalasynda sátti engizildi jáne búkil el boıynsha aýqymyn keńeıtip júrgiziledi, — dedi ol.
Sondaı-aq, vıtse-premer AgriTech Hub — aýyl sharýashylyǵy men sý resýrstaryn basqarýǵa arnalǵan spýtnıktik derekter, Big Data jáne AI negizinde tsıfrlyq sheshimderdi ázirleıtin startapty atap ótti.
— Onyń mıssııasy — agrarlyq sektor úshin turaqty sheshim qurýǵa arnalǵan zamanaýı taldaý ádisterin boljamdy modeldermen biriktirý arqyly tabıǵı resýrstardy tıimdi paıdalanýǵa jáne táýekelderdi azaıtýǵa kómektesetin analıtıkalyq derekterdi usyný. 2025 jyly jobalardy 2 el qamtydy. Biri — Ózbekstan, sondaı-aq Qazaqstannyń Túrkistan jáne Jambyl oblystarynyń iske asyrylǵan jobalary. Bıyl joba Qazaqstannyń barlyq aýmaǵyn qamtı otyryp, keńeıip keledi. 2026 jyly Ortalyq Azııada — Ózbekstan, Qyrǵyzstan jáne Tájikstanda qyzmetterdi keńeıtý, transshekaralyq sý resýrstarynyń spýtnıktik derekterimen almasýdyń halyqaralyq platformasyn iske qosý, sondaı-aq Big Data jáne MLsheshimderdi damytý josparlanýda, — dedi Jaslan Madıev.
Buǵan deıin «Smart Turmys» turǵyn úı-kommýnaldyq sharýashylyǵynyń biryńǵaı tsıfrlyq platformasy ázirlenip jatqanyn jazǵan edik.