Bıyl tórt aıda agroónerkásip keshenine 213 mlrd teńge ınvestıtsııa tartyldy

ASTANA. KAZINFORM — 2025–2027 jyldarǵa arnalǵan agroónerkásiptik keshen salasynda ınvestıtsııalyq jobalardy júzege asyrý jónindegi jol kartasy ázirlendi. Bul týraly Aýyl sharýashylyǵy vıtse-mınıstri Ermek Kenjehanuly málim etti. 

— 2025 jyldyń alǵashqy tórt aıynyń qorytyndysy boıynsha agroónerkásip keshenindegi negizgi kapıtalǵa salynǵan ınvestıtsııalar kólemi 213 mlrd teńge boldy, bul 2024 jylǵy kórsetkishpen salystyrǵanda 118%-ǵa artyq (180,6 mlrd teńge), — dedi Ermek Kenjehanuly ortalyq kommýnıkatsııalar qyzmeti alańynda ótken baspasóz máslıhatynda.

Onyń ishinde:

— aýyl jáne balyq sharýashylyǵyna — 164,2 mlrd teńge;

— tamaq ónimderi óndirisine — 48,7 mlrd teńge.

— Ulttyq banktiń deregi boıynsha, ótken jyly aýyl, orman jáne balyq sharýashylyǵyna sheteldik ınvestorlardan 26,1 mln AQSh dollar tikeleı ınvestıtsııa tartyldy, — deıdi mınıstrdiń orynbasary.

Sondaı-aq brıfıng barysynda 2025–2027 jyldarǵa arnalǵan agroónerkásiptik keshen salasynda ınvestıtsııalyq jobalardy júzege asyrý jónindegi jol kartasy ázirlengeni aıtyldy.

— Atalǵan qujat aıasynda jalpy quny 3,3 trln teńge bolatyn 677 jobany iske asyrý josparlanyp otyr. Onyń ishinde bıyl 282 joba, jalpy somasy 611,2 mlrd teńge, 2026 jyly 267 joba, jalpy somasy 1,1 trln teńge, 2027 jyly 128 joba, jalpy somasy 1,5 trln teńge. Investıtsııa eń kóp baǵyttalǵan sala — qaıta óńdeý jobalary (shamamen 1 478 mlrd teńge), ekinshi orynda sýarý salasyndaǵy jobalar (216 mlrd teńge), úshinshi orynda mal sharýashylyǵy boıynsha jobalar (194,6 mlrd teńgeden astam), — dep tolyqtyrdy vıtse-mınıstr.

Aıta keteıik, agroónerkásip salasyna jasandy ıntellekt engizýge grant bólinedi.