Bıyl toǵyz aıda jalpy ishki ónim 4 paıyzǵa artty – Ulttyq bank

ASTANA. KAZINFORM – Inflıatsııa birtindep tómendep keledi, al elimizge kelsek, qazir ekonomıkalyq jaǵdaı – turaqty, dınamıka – oń. Bul týraly Ulttyq banktiń tóraǵasy Tımýr Súleımenov málim etti.

«Bıyl jahandyq ekonomıkanyń damýyna geosaıası turaqsyzdyq yqpal etip jatyr. Bul birqatar áskerı qaqtyǵystarǵa, álemdegi saýda-sattyq pen ınvestıtsııalardyń tómendeýine baılanysty. Halyqaralyq valıýta qorynyń jańartylǵan boljamy boıynsha, álemdik ekonomıkanyń ósýi 2024 jáne 2025 jyldary 3,2% bolady. Ortalyq bankter óziniń qatań monetarlyq saıasatyn saqtaǵandyqtan, jahandyq ınflıatsııalyq protsester baıaý qalyptasyp otyr. Degenmen, qazir damyǵan elderde ınflıatsııa ortalyq bankterdiń nysanaly kórsetkishine jaqyn. Bul jetekshi elderdegi ortalyq bankterdiń aqsha-kredıt saıasatyn birtindep jeńildetýge jaǵdaı jasaıdy», - dedi Tımýr Súleımenov Májilistiń jalpy otyrysynda. 

Ulttyq bank tóraǵasynyń aıtýynsha, ınflıatsııa birtindep tómendep keledi.

«Qazaqstandy alsaq, qazirgi ekonomıkalyq jaǵdaı – turaqty, dınamıka – oń. Bıyl qańtar-qyrkúıek aılarynda jalpy ishki ónim 4,0%-ke artty. Ekonomıkanyń barlyq sektorynda ónim shyǵarýda ósim bar. Eń joǵary ósim aýyl sharýashylyǵynda, qurylys pen kólik salasynda baıqalyp otyr. Inflıatsııa birtindep tómendep keledi. Qyrkúıektiń qorytyndysy boıynsha ınflıatsııa deńgeıi 8,3% boldy. Bul 2023 jylǵy eń joǵary kórsetkishpen salystyrǵanda 2,5 ese tómen. Alaıda, bul kórsetkish Ulttyq Banktiń 5%-tik targetinen áli de alys», - deıdi ol. 

Sondaı-aq, T. Súleımenov ınflıatsııanyń baıaýlaý úrdisindegi mańyzdy faktor – azyq-túlik ınflıatsııasynyń 5% bolǵanyn aıtty.