Bıyl toǵyz aıda aqyly joldardan bıýdjetke 62 mlrd teńge tústi

ASTANA. KAZINFORM – Búginde elimizde 26 aqyly jol ýchaskesi bar, olardyń jalpy uzyndyǵy – 4883 shaqyrym.

- 2025 jylǵy 9 aıdyń ishinde aqyly joldardan bıýdjetke 62 mlrd teńge tústi. Ol qarajat joldardy kútip-ustaýǵa jáne jańa tehnıka alýǵa jumsalyp jatyr, - dedi «QazAvtoJol» ulttyq kompanııasynyń basqarma tóraǵasy Darhan Imanashev ortalyq kommýnıkatsııalar qyzmeti alańynda ótken baspasóz máslıhatynda.

Odan ári basqarma tóraǵasy jol boıyndaǵy qyzmetke toqtaldy.

- Respýblıkalyq avtojoldar boıynda 1500-ǵa jýyq qyzmet kórsetý nysandary bar. Olardyń 93%-y (1306 nysandy) Ulttyq standart talaptaryna sáıkes keledi. Bıyl 9 aıdyń ishinde 33 jańa jol boıyndaǵy nysan salynyp (ájethana, janarmaı quıý stansalary, qonaq úıler, ashanalar, kempıngter) qoldanysqa berildi. Sonymen qatar jolaýshylarǵa qolaıly jaǵdaı jasaý maqsatynda 30 sanıtarlyq-gıgıenalyq torapty iske qostyq. Olardyń ishinde jyly ájethanalar, shaǵyn dúken jáne kafeterııler bar. Qazir olardyń sany 155-ke jetti. Aldaǵy jyldary modýldi keshenderdiń sanyn arttyryp, jol boıyndaǵy salqyn ájethanalardy kezeń-kezeńmen azaıtýdy kózdep otyrmyz, - deıdi ol.

Onyń aıtýynsha, qazir ulttyq kompanııa jol boıyndaǵy nysandarǵa arnaıy «dızaın kod» ázirlep, ortaq standartqa keltirip jatyr.

Aıta ketsek, elimizde kesheden bastap aqyly joldarda jyldamdyqty asyrý faktilerin tirkeý bastaldy.