Bıyl «Taza Qazaqstan» bastamasy aıasynda 934 ekologııalyq is-shara ótkizildi
ASTANA. KAZINFORM — Bıyl «Taza Qazaqstan» bastamasy aıasynda 934 ekologııalyq is-shara ótkizildi. Bul týraly Ekologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Erbolat Qojyqov aıtty.
— Zańsyz úıindilerdi joıý jumystary «Taza Qazaqstan» jalpyulttyq bastamasynyń bir baǵyty sanalady. Baǵdarlamanyń negizgi maqsaty — azamattardyń taza jáne qaýipsiz ómir súrý ortasyn qurý jáne aýmaqtardyń sanıtarlyq jaǵdaıy basty nazarda. Qoǵamdyq baqylaýdy kúsheıtý úshin Telegram tsıfrlyq quraly — @TazaQazBot chatboty belsendi túrde qoldanylýda. Ol turǵyndarǵa úıindilerdiń paıda bolý faktileri týraly tikeleı habarlaýǵa, fotosýretterdi qosýǵa jáne ótinishterdi oryndaý nátıjeleri boıynsha keri baılanys alýǵa múmkindik beredi, — dedi komıtet basshysy Ortalyq kommýnıkatsııalar qyzmetindegi brıfıngte.
Erbolat Qojyqovtyń dereginshe, jyl basynan beri chatbotqa 17 myńǵa jýyq ótinish túsip, onyń 15 myńnan astamy oryndaldy. Olardyń basym bóligi aýmaqtardy tazalaý, kóshelerdi abattandyrý jáne turmystyq qaldyqtardy shyǵarý máselelerine qatysty. Ótinishter sapasyz oryndalǵan nemese resmı jaýaptar berilgen, belgilengen merzimge saı kelmegen nemese oryndaýshylar tarapynan naqty is-áreketter bolmaǵan jaǵdaıda paıdalanýshylarǵa shaǵym berý múmkindigi bar. Máselen, bıyl 530 aryz-shaǵym túsip, onyń 476-sy oryndaldy. Shaǵymdar negizinen aýmaqtardyń nashar tazalyǵy, jol jaǵdaıy, abattandyrý, kóshelerdi abattandyrý jáne turmystyq qaldyqtardy shyǵarý máselelerine qatysty boldy.
— 2025 jyly «Taza Qazaqstan» bastamasy aıasynda 934 ekologııalyq is-shara ótkizildi. Onyń nátıjesinde 506 myń tonna qaldyqtar jınalyp, 859,6 myń gektar alqap tazartyldy. 2,4 mln jasyl jelek otyrǵyzyldy. 4,2 mıllıonnan astam adam qatysty, onyń 357 myńy — eriktiler. Bul áreketter qoqystardy joıýmen qatar turǵyndar arasynda qorshaǵan ortaǵa uqyptylyqpen qaraý mádenıetin qalyptastyrady, — dedi ol.
Buǵan deıin Soltústik Qazaqstan oblysynda jergilikti atqarýshy organdar ruqsat etilmegen qoqys polıgondaryn joıý týraly jalǵan derekter bergenin jazǵan edik.