Bıyl taǵy 2 spýtnıktik ınternet operatory jumysyn bastaıdy
ASTANA. KAZINFORM – Bıyl sheteldik 2 spýtnıktik ınternet operatory elimizde óz jumysyn bastaıdy. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.
- Shalǵaı eldi mekenderdi ınternetpen qamtamasyz etý máselesi spýtnıktik baılanys jobalary arqyly sheshilip jatyr. Qazir Qazaqstanda 3 spýtnıktik ınternet operatory jumys isteıdi. Taıaý ýaqytta taǵy 2 sheteldik kompanııa paıda bolady. Olar boıynsha pılottyq synaqty osy jyly ótkizý josparlanǵan. Sonymen qatar bıyl Qazaqstan temir joly poıyzdary men Air Astana ushaqtarynda spýtnıktiń ınternet iske qosylady. Ákimdikter ınternet joq jerlerde, týrıstik jáne jetý qıyn lokatsııalarda jergilikti bıýdjet qarajaty esebinen spýtnıktik ınternetpen qamtamasyz etýi qajet, - dedi Jaslan Madıev.
Onyń aıtýynsha, Qazaqstan Eýropa men Azııa arasynda strategııalyq orynǵa ıe ári halyqaralyq ınternet-trafıginiń tranzıtinde mańyzdy ról atqarady.
- Tranzıttik áleýetti arttyrý maqsatynda Ázerbaıjan Respýblıkasyna deıin Kaspıı teńiziniń tabanymen talshyqty kabel salý bastaldy. Jobany osy jyldyń sońyna deıin aıaqtaý josparlanǵan, - dedi vıtse-premer.
Buǵan deıin aldaǵy eki jylda 3 myńnan astam aýyl joǵary jyldamdyqty ınternetpen qamtamasyz etiletinin jazǵan edik.