Bıyl sýdy zańsyz alǵandarǵa 41 mln teńge aıyppul salyndy
ASTANA. KAZINFORM – Túrkistan oblysynda shart jasaspaı sý alýdyń 39 faktsi anyqtaldy. Bul týraly Úkimet otyrysynda Sý resýrstary jáne ırrıgatsııa mınıstri Nurjan Nurjigitov aıtty.
- Osy jyldyń basynan bastap, fermerlermen sý berý boıynsha sharttardy jasasý rásimin elektrondyq formatqa kóshirý jumystary júrgizilýde. Engizilip jatqan aqparattyq júıe sýmen qamtamasyz etýdiń tolyq tsıklin qamtıdy: ótinish berý men shart jasasýdan bastap, naqty sý tutynýdy esepke alý jáne ony tóleýge deıin. Qazirgi ýaqytta 25 myńnan astam elektrondyq shart jasalǵan, - dedi mınıstr.
Onyń málimetinshe, sý resýrstaryn basqarýdaǵy ashyqtyqty arttyrý jáne jedel baqylaýdy kúsheıtý maqsatynda engizilip jatqan tsıfrlyq sheshimder Jerdi qashyqtyqtan zondtaý negizindegi ǵaryshtyq monıtorıngpen tolyqtyrylýda. Bul monıtorıngpen eldiń bes ońtústik oblysy tolyq qamtylǵan.
- Osy vegetatsııalyq maýsymda ǵaryshtyq monıtorıng nátıjesinde Túrkistan oblysynda shart jasaspaı sý alý boıynsha 39 fakt anyqtaldy. Nátıjesinde 197 gektar jerdi sýarý úshin agrarshylar zańsyz shamamen 790 myń tekshe metr sý alǵany belgilendi. Qazirgi ýaqytta keltirilgen shyǵyndardy óndirip alý jumystary júrgizilýde. Sonymen qatar 2025 jyly basseındik sý ınspektsııalary 365 ákimshilik aıyppul saldy. Onyń jalpy somasy 75,2 mln teńgeni qurady. Al 2026 jyldyń ótken kezeńinde 99 ákimshilik aıyppul salynyp, jalpy soma 41 mln teńgege jetti. Bul jumys Bas prokýratýramen birlesip bekitilgen «sýdyń qara naryǵyn joıý» jol kartasy aıasynda júzege asyrylýda, - dedi Nurjan Nurjigitov.
Aıta keteıik, Úkimet otyrysynda kóktemgi dala jumystarynyń barysy talqyǵa salynyp jatyr.
