Bıyl sý sharýashylyǵy salasynyń 1 400-den astam qyzmetkeri biligin arttyrady
ASTANA. KAZINFORM — Qazaqstanda jyl sońyna deıin sý sharýashylyǵy salasynyń 1 400-den astam qyzmetkeri biligin arttyrý kýrstarynan ótedi.
Sý resýrstary jáne ırrıgatsııa mınıstri Nurjan Nurjigitov sý sharýashylyǵy salasynda eńbek etip júrgen mamandardy qaıta daıarlaý jáne olardyń biligin arttyrý máselelerine arnalǵan apparat keńesin ótkizdi.
Qazirgi ýaqytta «Qazsýshar» RMK-nyń birqatar mamany Qazaq sý sharýashylyǵy ǵylymı-zertteý ınstıtýty, Qazaq ulttyq sý sharýashylyǵy jáne ırrıgatsııa ýnıversıteti jáne Qazaq ulttyq agrarlyq zertteý ýnıversıteti bazasynda bilim alyp jatyr. Oqytý «Qazaqstandaǵy sý resýrstaryn basqarý, sýarmaly jerlerdiń melıoratsııasy jáne gıdrotehnıkalyq qurylystardyń senimdi jumys isteýi», «Sý resýrstaryn basqarý, ırrıgatsııalyq júıelerdi qaýipsiz paıdalaný, sý únemdeý tehnologııalary, sý paıdalanýshylarmen ózara is-qımyl jáne sý jetkizýdi uıymdastyrý» jáne «Qazaqstan Respýblıkasyndaǵy aýyz sýmen qamtamasyz etý: qazirgi jaǵdaıy, tehnologııalary jáne turaqty damý» baǵdarlamalary boıynsha júrgizilip jatyr.
2026 jyldyń sońyna deıin «Qazsýshar» RMK bilikti arttyrý kýrstarymen 1 404 qyzmetkerdi qamtýdy josparlap otyr.
Budan bólek, jyl basynan beri mınıstrliktiń ortalyq apparaty, «Qazsýshar» RMK, «Qazgıdrogeologııa» ulttyq gıdrogeologııalyq qyzmeti jáne basqa da vedomstvolyq baǵynysty uıymdardyń 63 qyzmetkeri Qytaı, AQSh jáne Japonııa sııaqty shetelderde bilimin jetildirdi.
Shetelde uıymdastyrylǵan bilikti arttyrý baǵdarlamalary «Irrıgatsııalyq qurylystardy paıdalaný, basqarý jáne tehnıkalyq qyzmet kórsetý, aýyl sharýashylyǵy jerleriniń ınfraqurylymyn damytý», «Sý resýrstaryn paıdalaný jáne sý ortasynyń lastanýymen kúres», sondaı-aq «Sý resýrstaryn tıimdi basqarý jáne paıdalaný» baǵyttaryn qamtıdy.
— Bilikti arttyrý baǵdarlamalary joǵary jáne orta kásiptik bilimi bar mamandardy ǵana emes, jumysshy mamandyqtarynyń ókilderin de qamtıdy. Osy maqsatta elimizdiń sý resýrstary salasyndaǵy ǵylymı jáne bilim berý uıymdarymen tyǵyz yntymaqtastyq jolǵa qoıylǵan. Sonymen qatar sheteldik seriktestermen birlesken oqý baǵdarlamalary ázirlenip jatyr. Kýrstar barysynda sý sharýashylyǵy salasynyń mamandary kúndelikti qyzmetinde qoldanýǵa bolatyn ózekti bilim men tájirıbe alady, — dedi Sý resýrstary jáne ırrıgatsııa mınıstrligi Ǵylym jáne ınnovatsııalar departamentiniń dırektory Marat Imanálıev.
Eske salaıyq, buǵan deıin elimizde sý únemdeý tehnologııasyn engizýdi qoldaıtyn keshendi baǵdarlama ázirlenetinin habarlaǵanbyz.
