Sý resýrstarynyń ulttyq aqparattyq júıesin ónerkásiptik paıdalanýǵa berý qajet – mınıstr
ASTANA. KAZINFORM – 2026 jyldyń sońyna deıin sý resýrstarynyń ulttyq aqparattyq júıesin ónerkásiptik paıdalanýǵa berý qajet. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Madıev aıtty.
– Sý resýrstaryn esepke alý, monıtorıngileý jáne taldaý protsesterin avtomattandyrý maqsatynda 2026 jyldyń sońyna deıin Sý resýrstary jáne ırrıgatsııa mınıstrligi sý resýrstarynyń ulttyq aqparattyq júıesin ónerkásiptik paıdalanýǵa berýdi qamtamasyz etýi qajet. Budan basqa nysanaly kórsetkishterge qol jetkizý úshin ınjenerlik jelilerdi tsıfrlandyrýdy kúsheıtý jáne derekterdi onlaın-berý arqyly esepke alý aspaptaryn engizýdi ákimdikterge jedeldetý usynylady, - dedi ol.
Vıtse-premer ákimdikterge salalyq júıelerdi ıntegratsııalaýdy jáne biryńǵaı tizilimderdi damytýdy jalǵastyrý qajettigin basa aıtty.
– Bul derekterdiń salystyrmalylyǵyn qamtamasyz ete otyryp, ashyqtyqty arttyrady jáne sýdy únemdeýge múmkindik beredi, - dedi Jaslan Madıev.
Buǵan deıin «Smart Turmys» turǵyn úı-kommýnaldyq sharýashylyǵynyń biryńǵaı tsıfrlyq platformasy ázirlenip jatqanyn jazǵan edik.