Bıyl sý mol, 15 kúnnen keıin qaıta ónim jınaımyz — túrkistandyq sharýalar
TÚRKІSTAN. KAZINFORM — «Bıyl sý — mol, halyq razy. 10-15 kúnnen keıin qaıta ónim jınaýdy josparlap otyrmyz». Túrkistan oblysynyń sharýalary 2024 jylǵy sýarý maýsymy týraly osyndaı piri aıtýda.
Sýarý maýsymy bastalǵaly sharýalarǵa Shardara sý qoımasynan Qyzylqum kanaly arqyly 682 mln tekshe metr sý jiberildi.
Búgingi tańda sý qoımasynda 2,6 mlrd m3 sý bar. Bul byltyrǵy kórsetkishten 600 mln tekshe metrge artyq. Sharýalardyń suranysyna sáıkes egis alqaptaryna sekýndyna 115 tekshe metr sý jiberilip jatyr.
«Kóktemde sý jaqsy keldi. Osynyń nátıjesinde Shardara sý qoımasy 90%-ǵa tolyp, 5 mlrd tekshe metrge jýyq sý jınaldy. Qazirgi tańda orta eseppen 125 m3/s sý kelip jatyr. Syrdarııa ózeniniń tómengi aǵysyna 650 m3/s sý jiberip jatyrmyz», — dedi Túrkistan oblysy boıynsha «Qazsýshar» fılıalynyń Shardara óńdiristik ýchaskesi basshysynyń orynbasary Ermek Isa.
Túristan oblysy dıqandary bıyl sý turaqty berilgendikten mol ónim alyp jatqandaryn aıtady. Qarbyz ekken sharýalar tipti, tamyz aıynda ekinshi márte ónim jınaýdy josparlap otyr.
«Bıyl sý mol boldy. Halyq razy. Jylda sýdan qınalatyn edik, biraq bıyl bári jaqsy. Qysta da sýdy jaqsy aldyq, jazda da sý ýaqytyly berildi. Bir márte jınap alyp, ekinshisin sýaryp jatyrmyz. Aldaǵy 10-15 kúnde taǵy ónim alýǵa nıettimiz», — deıdi fermer Tólepbergen Artyqov.
Eske sala keteıik, Memleketaralyq sý sharýashylyǵyn úılestirý komıssııasynyń 86-shy úkimetaralyq otyrysynda memleketaralyq «Dostyq» kanaly arqyly Ózbekstannan Qazaqstanǵa 922 mln m3 sý jiberý týraly kelisimge qol jetkizilgen bolatyn.
Jalpy sýarý kezeńi bastalǵaly beri Ózbekstannan elimizge 3,9 mlrd tekshe metr sý keldi.
