Bıyl «Stadler Qazaqstan» zaýytynyń 51 vagony paıdalanýǵa beriledi

ASTANA. KAZINFORM — Elimizdegi jolaýshylar vagondarynyń 42 paıyzynyń tozyǵy jetken. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty. 

— Bıyl qańtarda Astanada jylyna júzge deıin jolaýshylar vagonyn shyǵaratyn «Stadler Qazaqstan» zaýyty iske qosyldy. Shyǵarylǵan vagondar 2030 jylǵa deıin kelisimshart aıasynda Qazaqstan temir jolyna jetkiziledi. Jyl sońyna deıin alǵashqy 51 vagon qoldanýǵa beriledi. Osy jyldyń basynda Atyraý oblysynda jylyna 6 myń júk vagony men tsısterna shyǵaratyn zaýyt iske qosyldy. Sonymen qatar jergilikti óndiris úlesin arttyrý maqsatynda ınvestor Foundry klasterin salýdy bastady. Zaýyttyń iske qosylýy 2027 jylǵa josparlanǵan, — dedi Ersaıyn Naǵaspaev.

Onyń dereginshe, bıyl Semeıdegi mashına jasaý zaýytynda jylyna 600 júk vagonyn shyǵaratyn jańa óndiris iske qosyldy. Budan bólek, Ekibastuzda daıyn temirjol tehnıkasyn jáne quramdas bólshekter men mańyzdy komponentter shyǵaratyn kásiporyndar klasteri salyndy. Bıyl osy klasterde jylyna 160 myńǵa deıin daıyn ónim shyǵaratyn bandajdyq keshen iske qosyldy.

Osylaısha, bul jobalar óndiris qýatyn odan ári ulǵaıtyp, ónim sapasyn arttyratyn bolady. Degenmen qabyldanǵan sharalarǵa qaramastan, vagon parkiniń tozý deńgeıi áli de joǵary kúıinde qalyp otyr. Atap aıtqanda, búginde júk vagondary parkiniń tozýy — 54 paıyz, lokomotıvter — 52 paıyz, jolaýshylar vagondary — 42 paıyz deńgeıinde. Elimizdiń vagon parkin jańartý otandyq mashına jasaý sektoryn damytýmen tyǵyz baılanysta bolýy tıis. Bul óndiristik qýatty ulǵaıtýǵa jáne vagon parkin jańǵyrtýǵa múmkindik beredi, — dedi ol.

Buǵan deıin Kólik mınıstri Nurlan Saýranbaev temirjol jelisiniń jalpy paıdalaný uzyndyǵy 16 myń shyqyrymdy quraıtynyn, tozý deńgeıi 57 paıyzǵa jetkenin aıtqan edi.