Bıyl sporttyq oqý oryndaryn 1200-den asa túlek aıaqtaıdy
ASTANA. KAZINFORM — Elimizde olımpıadalyq rezervtiń 19 mamandandyrylǵan mektep-ınternat kolledji jumys isteıdi. Onyń 5-i respýblıkalyq, al 14-i óńirlik, dep habarlaıdy Ǵylym jáne joǵary bilim mınıstrligi.
Memleket basshysy Qasym-Jomart Toqaev buqaralyq sportty jan-jaqty qoldaýdyń, sonyń ishinde salalyq bilim berýdi damytýdyń mańyzyn birneshe ret atap ótken bolatyn. Dál osy mamandandyrylǵan oqý oryndarynda ulttyq jarystardan bastap halyqaralyq arenalarǵa deıingi otandyq sportshylardyń bolashaq jetistikteriniń irgetasy qalanady.
2024–2025 oqý jylynyń qorytyndysy boıynsha sporttyq oqý oryndaryn 1200-den astam jas túlek aıaqtap, ulttyq qurama sapyn tolyqtyrýǵa daıyn. 490 túlek respýblıkalyq oqý oryndaryn bitirdi. 730-dan astamy — óńirlik mektepter men kolledjderden túlep shyqty.
Respýblıkalyq oqý oryndary arasynda túlekter sany boıynsha kóshbasshylar:
- Almaty qalasyndaǵy RMQK «Respýblıkalyq olımpıadalyq rezervtiń mektep-ınternat-kolledji» — 129 túlek
- K. Ahmetov atyndaǵy mektep — 124 túlek
- Q. Muńaıtpasov atyndaǵy mektep — 99 túlek
- Respýblıkalyq sport kolledji — 93 túlek
- Rıdder qalasyndaǵy mektep — 45 túlek
— Bul kórsetkish olımpıadalyq rezervti daıarlaý júıesiniń turaqty ári nátıjeli jumysyn kórsetedi. Qazaqstan sporttyq bolashaqqa, eń aldymen bilim berý salasynan bastap, senimdi túrde ınvestıtsııa salýdy jalǵastyrady, — delingen habarlamada.
Osyǵan deıin jambyldyq sheneýnikter qarjy joq degen jeleýmen balalardyń sportpen shuǵyldaný kezegin zańsyz toqtatqany anyqtaldy.