Bıyl SQO-da veterınarııalyq talaptardy buzǵandarǵa 11 mln teńge aıyppul salyndy
PETROPAVL. KAZINFORM — Soltústik Qazaqstan oblysynda bıyl saýda nysandarynda et ónimderin satýmen aınalysatyndarǵa qatysty 12 zańbuzýshylyq tirkelgen.
Veterınarııalyq baqylaý jáne qadaǵalaý komıtetiniń SQO aýmaqtyq ınspektsııasynyń málimetinshe, tekserý qorytyndysy boıynsha 6 nusqama berilip, taǵy 6 jaǵdaıda ákimshilik aıyppul salynǵan. Jalpy somasy — 584 myń teńge. Desek te, nysandardyń qyzmetin shekteý nemese toqtatý qajettiligi týyndamaǵan.
Mal men mal ónimderin zańsyz tasymaldaý jáne ótkizý faktileriniń aldyn alý maqsatynda veterınarııalyq baqylaý mamandary polıtsııa qyzmetkerlerimen birlesip reıdter ótkizedi. 2025 jyly oblys aýmaǵynda osyndaı 282 is-shara ótkizilgen. Nátıjesinde veterınarııalyq zańnama talaptaryn buzýdyń 234 deregi anyqtaldy. 207 ákimshilik materıal toltyrylyp, jalpy somasy 9 mln 721 myń teńgege aıyppul salyndy. Onyń 8 mln 800 myń teńgesi óndirilip alynǵan.
Al osy jyldyń basynan beri veterınarııalyq baqylaý mamandary polıtsııa qyzmetkerlerimen birlesip 245 reıd ótkizgen, veterınarııalyq zańnama talaptarynyń buzýdyń 210 faktisi anyqtalǵan. Quqyqbuzýshylyqtar boıynsha 199 ákimshilik materıal rásimdelip, jalpy somasy 11 mln teńge shamasynda aıyppul salynǵan. Búginge deıin onyń 9 mln teńgege jýyǵy óndirildi.
Mamandardyń aıtýynsha, mundaı baqylaý sharalarynyń negizgi maqsaty — veterınarııalyq talaptardy saqtaýdy qamtamasyz etý, aýrý maldan alynǵan ónimderdiń saýdaǵa túsýine jol bermeý jáne halyqtyń qaýipsizdigin qorǵaý.
Buǵan deıin SQO-da turǵyndar qandaı veterınarııalyq talaptardy jıi buzatynyn jazǵan edik.
