Bıyl Syrdarııa arqyly keletin sý byltyrǵydan da az bolady — mınıstr

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Úkimet otyrysynda Syrdarııadan keletin sýdyń azaıyp jatqanyn «obektıvti shyndyq» dep sıpattady.

— Sarapshylardyń boljamy boıynsha aldaǵy vegetatsııalyq kezeńde Qazaqstannyń ońtústigindegi ózen basseınderinde sý aǵynynyń qysqarýy kútiledi. Syrdarııa ózeniniń joǵarǵy aǵysynda kórshi memleketter aýmaǵynda ornalasqan sý qoımalarynyń qazirgi tolýy ótken jyldyń osy kezeńimen salystyrǵanda 3,2 mlrd tekshe metrge tómen, — dedi ol.

Mınıstr 12 qańtardaǵy jaǵdaı boıynsha ońtústiktegi sý qoımalarynyń tolýy ótken jylmen salystyrǵanda 1,9 mlrd tekshe metrge az ekenin aıtty.

— Bul kúz-qys maýsymyndaǵy jaýyn-shashynnyń azaıýy, muzdyq aǵynynyń qysqarýy jáne klımattyń ózgerýiniń jalpy áserine baılanysty obektıvti shyndyq. Bul faktorlar uzaq merzimdi sıpatqa ıe jáne oǵan júıeli beıimdelýdi talap etedi, — dedi vedomstvo basshysy.

Aıta keteıik, búgin Úkimet otyrysynda sý únemdeý tehnologııalaryn engizý sharalaryn pysyqtady.