Bıyl Syr óńirinde «Rýhanııat jyly» bolyp jarııalandy

QYZYLORDA. KAZINFORM - Bıyl Syr óńirinde «Rýhanııat jyly» bolyp jarııalandy. Igi bastama halqymyzdyń jyl basy, jańarý kezeńi sanalǵan Naýryz aıynan bastaldy.

Bul týraly oblys ákimi Nurlybek Nálibaev Qyzylorda qalasynda ótken Ortalyq kommýnıkatsııalar qyzmetiniń kóshpeli brıfınginde aıtty.

«Mádenıet salasynda 1000 oryndyq kópfýnktsıonaldy «Óner ortalyǵy» paıdalanýǵa berildi. Syr mádenıetiniń negizgi brendi – jyraýlyq dástúr ókilderi kópten kútken ıgilik «Jyraýlar úıi» jumysyn bastady», – dedi N.Nálibaev.

Aıta keteıik, bıyl 11,5 mlrd. teńge qarjy bólinip, barlyq aýdanda neke qııý zaly, kitaphana, mýzeı, arhıv, jastar saraıy, ardagerler men analar úıi biriktirilgen «Rýhanııat» ortalyqtarynyń qurylysy bastaldy. Barlyǵy jyl sońyna deıin paıdalanýǵa beriledi. Bul ortalyqtarda ulttyq qundylyqtar dáriptelip, salt-dástúr nasıhattalady.

«Rýhanııat jyly» aıasynda sol jaǵalaýdan quny 2,3 mlrd teńge bolatyn oblystyq tarıhı-ólketaný mýzeıi ǵımaratyn salý jumystary bastaldy. Sońǵy 2 jylda sımfonııa orkestri, ınklıýzıvti teatr, jastar teatry, «Anaǵa taǵzym», zamanaýı bı jáne hor ujymy jańadan jasaqtaldy.

Byltyrdan beri mádenıet jáne óner, ádebıet ókilderine jyl saıyn «Turan» arnaıy syılyǵy tabystala bastady. Dástúrli syılyq eki jylda 40 laıyqty tulǵaǵa berildi.

Jyldar boıy júrgizilgen arheologııalyq qazba jumystarynyń nátıjesimen «Shirik Rabat saq jaýyngeri», «Syǵanaq hanshaıymy» rekonstýrktsııalary, «Túgisken kósemi» jáne «Jetiasar aqsúıek áıeli» altyndatqan músinderi jasalyp, oblystyq mýzeı qoryna ótkizildi.

Halyqaralyq «Túrksoı» uıymynyń sheshimimen mádenıet jáne rýhanııat salasynda atqarylǵan jumystar úshin Syr óńirine túrki dúnıesiniń «Eń úzdik mádenı aımaǵy» nomınatsııasy berildi.

Balalar men jasóspirimderdiń shyǵarmashylyǵyn shyńdaý maqsatynda oblys ortalyǵynan quny 11 mlrd teńge bolatyn «Shyǵarmashylyq akademııasy» salynýda. Munan bólek, halyqaralyq standarttarǵa saı keletin 11 myń oryndyq «Ortalyq stadıon» jáne jabyq basseıni bar kópsalaly deneshynyqtyrý-saýyqtyrý kesheniniń qurylysy bastaldy.

Jýyrda ǵana sol jaǵalaýdan «Ústel tennısi ortalyǵy» ashyldy. Jastar men balalardy sporttyq úıirmelermen qamtýǵa múmkindik beretin «Qyzylorda Arena» kópbeıindi sport kesheni salynady, taǵy 10 keshenniń qurylysy bastaldy.