Bıyl Shymkentten 660-tan asa azamat jumys kúshi tapshy óńirlerge kóshti

ShYMKENT. KAZINFORM — Jyl basynan beri Shymkent qalasynan 162 otbasy, ıaǵnı 668 adam eńbek kúshi tapshy óńirlerge kóship bardy.

Qalalyq jumyspen qamtý jáne áleýmettik qorǵaý basqarmasynyń málimetinshe, Shymkentten kósh túzegen azamattardyń basym bóligi Pavlodar oblysyn tańdaǵan. Bul óńirge 57 otbasydan turatyn 234 adam qonystandy.

— Sondaı-aq 19 otbasynyń 79 múshesi Shyǵys Qazaqstan oblysyna, 53 otbasydaǵy 213 adam Soltústik Qazaqstan oblysyna jáne 20 otbasynyń 83 múshesi Qostanaı oblysyna turaqtady. Budan bólek, 4 otbasynyń 18 adamy Abaı oblysyna, 4 otbasynyń 14 adamy Qaraǵandy oblysyna, al 5 otbasynyń 27 múshesi Ulytaý oblysyna kóship bardy, — delingen vedomstvo usynǵan aqparatta.

Sonymen qatar, bıyl qalaǵa 1 045 qandas kóship keldi. Qonystanǵan qandastardyń basym bóligi Ózbekstannan kelgen — 1 029 adam. Al Qytaı men Reseıden 7 adamnan, Qyrǵyzstan men Shrı-Lankadan 1 adamnan kelgen. Qandastardyń kópshiligi qurylys, saýda-sattyq jáne ózge de salalarda eńbek etedi.

Olardyń negizgi bóligi eńbekke qabiletti jasta. Qandastardy qoǵamǵa beıimdeý jáne jumyspen qamtý baǵytynda tıisti sharalar qabyldanyp, qazirgi tańda 22 qandas jumyspen qamtý baǵdarlamalaryna tartyldy.

Budan buryn ońtústikten soltústikke kóshkisi keletinder qatary kóbeıip kele jatqanyn jazǵan edik.