Bıyl shekaradan 300 tonnadan astam janarmaı zańsyz ótkizilmek bolǵan - UQK
ASTANA. KAZINFORM – Ulttyq qaýipsizdik komıtetiniń Shekara qyzmeti munaı ónimderin memlekettik shekara arqyly zańsyz áketý áreketteriniń jolyn kesý jumystaryn jalǵastyryp jatyr.
Vedomstvonyń málimetinshe, 2026 jyldyń basynan beri ótkizý beketterinde janar-jaǵarmaı materıaldaryn zańsyz alyp ótýdiń 2400-den astam faktisi anyqtalǵan.
– Zańsyz aınalymnan alynǵan benzın, dızel otyny, kerosın jáne ózge de munaı ónimderiniń jalpy kólemi 300 tonnadan asty, – delingen habarlamada.
Alyp qoıylǵan janar-jaǵarmaıdyń aldyn ala quny shamamen 60 mln teńgeni quraıdy.
UQK Shekara qyzmeti anyqtalǵan quqyq buzýshylyqtar boıynsha kináli tulǵalardyń qoldanystaǵy zańnamaǵa sáıkes jaýapkershilikke tartylǵanyn habarlady.
– Bul sharalar eldiń energetıkalyq qaýipsizdigin qamtamasyz etýge jáne janar-jaǵarmaı materıaldarynyń kóleńkeli aınalymyna jol bermeýge baǵyttalǵan, – dep atap ótti vedomstvo.
Shekara qyzmetiniń málimetinshe, munaı ónimderin zańsyz tasymaldaý arnalaryn anyqtaý jáne jolyn kesý boıynsha jumystar aldaǵy ýaqytta da jalǵasady.
Aıta keteıik, «Qazaqmys» nysandarynan janarmaı men ken urlaǵan toptar ustaldy.
