Bıyl shekara beketterinen ótken kólik sany 17%-ǵa kóbeıdi
ASTANA. KAZINFORM — Elektrondy kezek júıesi ótkizý beketterindegi tártipti retteý, ashyqtyqty qamtamasyz etý jáne ótkizý qabiletin arttyrý maqsatynda engizilgen.
Bul týraly QR QM Memlekettik kirister komıtetiniń Ótkizý pýnktterin úılestirý basqarmasynyń bas sarapshysy Asanhan Erhan málim etti.
Onyń aıtýynsha, atalǵan júıe kólik quraldarynyń shekaradan ótý ýaqytyn aldyn ala josparlaýǵa múmkindik beredi.
— Qabyldanǵan sharalardyń nátıjesinde avtokólikterdiń shekaradan ótý ýaqyty 30 mınýtqa qysqardy. Sonymen qatar ótkizý qabileti 2022 jylmen salystyrǵanda 2,5 esege artty. Bıylǵy jyldyń alǵashqy 4 aıynda ótkizý beketteri arqyly 553 myńnan astam kólik ótti, bul ótken kezeńmen salystyrǵanda 17 paıyzǵa joǵary, — dedi spıker.
Sondaı-aq ol júıeniń jumysyna qatysty túsinik berdi.
— Qazirgi ýaqytta júıe shtattyq rejımde jumys istep tur. Slottardyń bolmaýy ótkizý beketteriniń múmkindikterine baılanysty. Buǵan qosa, shekaralas elderdiń ótkizý qabileti de áser etedi. Eger kórshi tarap kólikti az qabyldasa nemese tehnıkalyq aqaýlar, jóndeý jáne jańǵyrtý jumystary júrgizilse, slottar sany azaıýy múmkin, — dedi Asanhan Erhan.
Spıker jańa ózgerister engizilgenin de atap ótti. Onyń sózinshe, árbir jasalǵan brondy ótkizý kúnine deıin 12 saǵat buryn kelesi kúnge nemese basqa kúnge aýystyrýǵa múmkindik bar. Bul rette tólengen qarajat saqtalady, bron kúshin joımaıdy. Ár bron úshin bir ret ózgeris engizý múmkindigi qarastyrylǵan.
Aıta keteıik, Smart Cargo logıstıkanyń Biryńǵaı terezeniń negizinde qurylǵan tasymaldaýdyń tsıfrlyq tólqujaty 2026 jylǵy 1 mamyrdan bastap NurJoly avtomobıl ótkizý beketinde iske qosylady.
Sonymen qatar Qostanaı oblysynda «Jelqýar» avtomobıl ótkizý pýnkti arqyly qozǵalys ýaqytsha toqtatyldy.
