Bıyl shegirtkemen kúreske 8,1 mlrd teńge bólindi

ASTANA. KAZINFORM – Bıyl shegirtkemen kúreske 8,1 mlrd teńge bólindi. Bul týraly Aýyl sharýashylyǵy mınıstri Aıdarbek Saparov málim etti. 

«Shegirtkemen kúreske erekshe nazar aýdarý kerek. Byltyr taralý aýmaǵy ulǵaıǵan edi, bıyl 2,5 mln ga alańda hımııalyq óńdeýler júrgizý josparlanýda. Osy jyly Aqtóbe oblysynda 784 myń gektar, Qostanaı oblysynda 775 myń gektar jáne Túrkistan oblysynda 272 myń gektar alańda shegirtke taralady dep kútilip otyr. Qazirgi kezde kúreske qajetti barlyq resýrs bar», - dep sendirdi Aıdarbek Saparov Úkimet otyrysynan keıin ótken baspasóz máslıhatynda. 

Onyń aıtýynsha, shegirtkelermen kúresý úshin pestıtsıdter qory satyp alyndy.

«Bıyl úıirli shegirtkemen kúresýge respýblıkalyq bıýdjetten 8,1 mlrd teńge bólindi. Óńdeý jumystaryn júrgizý úshin qajetti tehnıkalar jetkilikti. Sonymen qatar shekara mańyndaǵy aýmaqtarda shegirtkeler jaǵdaıy qadaǵalaýymyzda bolady. Ótken jylǵy jaǵdaı qaıtalanbaýy úshin ákimdikter shegirtkege qarsy kúres máselelerine óte muqııat jáne jaýapkershilikpen qaraýy kerek», - deıdi vedomstvo basshysy. 

Eske salsaq, buǵan deıin elimizdegi sý tasqynynan 9 761 bas mal qyrylyp, ólekselerdiń 98%-y joıylǵanyn jazǵan edik.