Bıyl sharýalarǵa 863 myń tonna dızel jeńildikpen beriledi – mınıstr

ASTANA. KAZINFORM – Energetıka mınıstri Erlan Aqkenjenov kúzgi dala jumystaryna daıyndyq sheńberinde aýyl sharýashylyǵy taýaryn óndirýshilerdi dızel otynymen qamtamasyz etý sharalary týraly aıtyp berdi.

Bıyl 24 maýsymda Energetıka jáne Aýyl sharýashylyǵy mınıstrlikteri 2025 jylǵy 1 shilde men 1 qarasha aralyǵynda 2025 jylǵy kúzgi dala jumystaryna 402 myń tonna dızel otynyn berý kestesin bekitken.

Oǵan qosymsha kúzgi dala jumystaryna 20 myń tonna jáne astyq pen maıly daqyldar keptirýge 40 myń tonna dızel otyny bólindi.

– 2025 jyly aýyl sharýashylyǵy taýarlaryn óndirýshilerge bólingen dızel otynynyń jalpy kólemi 863 myń tonna. Onyń ishinde kóktemgi dala jumystaryna 401 myń, kúzgi dala jumystaryna 422 myń jáne keptirýge 40 myń tonna, – dedi mınıstr Úkimettiń búgingi otyrysynda.

Buǵan deıin eki jylda baǵa óńirlerge jetkizile otyryp, lıtrine 228 teńge deńgeıinde saqtaldy.

– Túpkilikti baǵa – aýyl sharýashylyǵy taýaryn óndirýshilerge lıtrine 250 teńge, dızel otynyn jetkizetin operatorlarynyń marjasy – lıtrine 22 teńge, bul avtojanarmaı quıý stansasynyń marjasynan edáýir joǵary. Energetıka mınıstrligi usynatyn dızel otynynyń qazirgi baǵasy taǵaıyndalǵan stantsııaǵa deıin lıtrine 232 teńge. Túpki baǵany operatorlar belgileıdi jáne lıtrine 254 teńge bolýy múmkin, – dedi E.Aqkenjenov.

Aýyl sharýashylyǵy taýarlaryn óndirýshiler úshin dızel otynynyń qozǵalysynyń ashyqtyǵy men qozǵalysyn qamtamasyz etý úshin jeke pın-kodtar alyndy, dızel otynyn sary, kók jáne qyzylǵa boıaý, elektrondy shot-faktýra júıesinde dızel otyny úshin bólek vırtýaldy qoıma qurý sharalary júrgizilgen.

Shilde-qyrkúıek aılarynda josparlanǵan 391 myń tonna dızeldiń 238 myńy nemese 60 paıyzy jóneltilgen.

Aıta keteıik, Úkimet búgin egin jınaý naýqanyn talqyǵa salyp jatyr.

Bıyl boljam boıynsha 24 mln tonna astyq bastyrylady.