Bıyl sharýalarǵa 700 mlrd teńge jeńildetilgen kredıt beriledi

ASTANA. KAZINFORM – Bıyl elimizde 8 mln ga jerge egin egý josparlanyp otyr. Egin maýsymayna daıyndyq jumystary týraly Aýyl sharýashylyǵy mınıstri Aıdarbek Saparov aıtyp berdi.

— Kóktemgi egis jumystaryna jeńildetilgen kredıt kólemi 700 mlrd teńge. Egis naýqanyn qarjylandyrý byltyr qarasha aıynda bastaldy. Fermerler sýbsıdııasyz, taza 5%-ben jeńildetilgen kredıtter alyp jatyr. Búginde 206 mlrd teńgege 1,8 myńnan astam sharýashylyq qarjylandyryldy. Bıyl keminde 8 mln ga egis alqaptaryn qamtýdy josparlap otyrmyz. Sondaı-aq, qaryz somasynyń 85% kepildik berý baǵdarlamasynyń iske asyrylýy jalǵasady. Sonymen qatar 200 mlrd teńge somasyna jeńildetilgen lızıngti uıymdastyrý otandyq tehnıkasynyń 6 myń birligin satyp alýǵa múmkindik beredi, — dedi Aıdarbek Saparov Úkimet otyrysynda. 

Onyń aıtýynsha, qazir 3,2 myń sharýadan 130 mlrd teńgege 5 myń tehnıkany satyp alýǵa ótinim kelip túsken.

-– Kóktemgi egis jumystaryn qarjylandyrýǵa áleýmettik kásipkerlik korporatsııalardyń qosylýy kredıt berýdiń qoljetimdiliktiń mańyzdy faktory boldy. Ótken jyly bul baǵdarlamaǵa 7 áleýmettik kásipkerlik korporatsııa qatysty, biraq búginde tek 4 korporatsııa qatysyp jatyr. Bul jaǵdaı sharýalardyń arasynda narazylyq týdyryp jatyr. Osyǵan baılanysty, oblys ákimdikterine áleýmettik kásipkerlik korporatsııa arqyly sharýalardy qarjylandyrý jumystaryn kúsheıtý kerek. Aýyl sharýashylyǵyn qarjylandyrýdy keńeıtý úshin qarjy ınstıtýttaryn tikeleı sýbsıdııalaý engiziledi. Bıyl agrarlyq nesıe korporatsııasy arqyly 48 mlrd teńge óńdeý kásiporyndaryn qoldaý úshin aınalym qarajatyna beriledi, — deıdi ol. 

Buǵan deıin elimizde kólik ınfraqurylymyn jańǵyrtýǵa berilgen qaryzǵa memlekettik kepil beretini týraly habarlaǵan edik.