Bıyl Semeıde 100 kóshege asfalt tóseledi
SEMEI. KAZINFORM – Oblys ákimi Berik Ýálı Semeı qalasyndaǵy kóshelerde júrgizilip jatqan aǵymdaǵy jóndeý jumystarynyń barysymen tanysty. Qazirgi ýaqytta oblys ortalyǵyndaǵy birneshe kósheniń joldary retke keltirildi.
Semeı qalasynda jalpy uzyndyǵy 756 shaqyrymdy quraıtyn 1 179 kóshe bar. Abaı oblysy qurylǵanǵa deıin qalalyq joldardyń tek 36 paıyzy ǵana asfaltty beton jabynymen qamtylǵan bolatyn. 2025 jyldyń qorytyndysy boıynsha asfalttaý deńgeıi 50 paıyzǵa jetkizildi. Qaladaǵy jol ınfraqurylymyn damytý jáne kóshe-jol jelisiniń sapasyn arttyrý maqsatynda 2026 jylǵa keshendi is-sharalar jospary ázirlendi.
Aımaq basshysy Mirjaqyp Dýlatov jáne Qaıym Muhamedhanov kósheleriniń qıylysyndaǵy jolda júrgizilip jatqan aǵymdaǵy jóndeý jumystaryn kórdi. Merdigerlerge jumysty merziminde ári sapaly aıaqtaýdy tapsyrdy. Jolaýshylar kóligi jáne avtomobıl joldary basqarmasyna jáne qala ákimine Ulttyq sapa ortalyǵy mamandarymen birlesip jol sapasyn turaqty baqylaýda ustaý qajettigin aıtty.
Oblys ákimi bıyl Semeıdi abattandyrýǵa aıryqsha kóńil bólinetinin, qaladaǵy 100 kóshege asfalt tóseý josparlanyp otyrǵanyn jetkizdi. Buryn asfalt tóselmegen kósheler men aýla aýmaqtaryna basymdyq beriledi.
– Basty maqsat – turǵyndarǵa qolaıly jaǵdaı jasaý. Asfalt sapasyna erekshe mán berý qajet. Halyq bárin kórip otyr. Joldardy jóndeýge qarajat bólindi. Endi naqty nátıje talap etiledi. Barlyǵy kepildik talaptaryna saı qadaǵalanady. Byltyr 40 aýlaǵa asfalt tóselse, bıyl ony eki jarym esege kóbeıtip, 100 aýlaǵa asfalt tósemekpiz. Ótken jyly 52 kósheni ortasha jóndeýden ótkizsek, bıyl sony eki eselep, 100 kóshege ortasha jóndeý júrgizemiz. Byltyr Semeıde 35 aýla abattandyrsaq, sony 3 esege kóbeıtip, 100 aýlany abattandyrǵaly otyrmyz. 2025 jyly 15 kóshe jaryqtandyrylǵan bolsa, bıyl ony alty jarym esege kóbeıtip, 100 kósheni jaryqtandyramyz. Mundaı aýqymdy jumys Semeıde buryn sońdy bolmaǵan, - dedi Berik Ýálı.
Aımaq basshysy sondaı-aq joldyń sapasyna qoǵamdyq baqylaý ornatýdyń mańyzdy ekenin atap ótip, qoǵamdyq keńes músheleri men partııa ókilderiniń bul iske belsendi atsalysýy kerek ekenin aıtty.