Bıyl satyp alynǵan aýyl sharýashylyǵy tehnıkasynyń 95 paıyzy elimizde qurastyryldy

ASTANA. KAZINFORM – Bıyl eskirgen aýyl sharýashylyǵy tehnıkasynyń úlesi 60 paıyzǵa deıin azaıtylady. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

tehnıka
Foto: AShM

- Aýyl sharýashylyǵy tehnıkasyn jańartý jumystary da jalǵasyp jatyr. Osy jyldyń 10 aıynda aýyl sharýashylyǵy tehnıkasy parkiniń jańarý deńgeıi 7,5%-ǵa jetti. Jyl qorytyndysy boıynsha bul kórsetkishti 8%-ǵa deıin jetkizý josparlanǵan. Sonymen birge eski tehnıkanyń úlesi azaıyp keledi. 2023 jyly tehnıkanyń tozý deńgeıi 90% bolsa, 2025 jyly 70%-ǵa, al bıyl 63%-ǵa deıin tómendedi. Jyl sońyna deıin bul kórsetkishti 60%-ǵa túsirý josparlanǵan, - dedi Aıdarbek Saparov

Onyń aıtýynsha, bul nátıjelerge jeńildetilgen lızıng baǵdarlamalarynyń arqasynda qol jetkizildi.

- Bıyl 10 aıda lızıng arqyly satyp alynǵan kombaındar kólemi 21%-ǵa, al traktor sany 16%-ǵa ósti. Eń mańyzdysy, satyp alynatyn tehnıkanyń 95%-y otanymyzda óndirilgen. Bul otandyq zaýyttardyń jumysyna da oń áserin tıgizip jatyr. Agromashholdıng kompanııasy 10 aıda 1 233 traktor shyǵardy. Bul ótken jylmen salystyrǵanda 9%-ǵa kóp. «Kazrost Injınırıng» kásiporny 262 kombaın shyǵardy. Bul 2025 jyldyń kórsetkishinen 72% kóp, - dedi mınıstr.

Aıta keteıik, bıyl alǵash ret sharýalarǵa jeńildikpen beriletin kredıt kólemi 1,2 trln teńgege jetti.