Bıyl Sátbaev kanalynan Shiderti ózeni jaıylmasyna rekordyq kólemde sý jiberiledi
PAVLODAR. KAZINFORM - «Qazsýshar» RMK Qanysh Sátbaev atyndaǵy kanaldan Shiderti ózenine 120 mln tekshe metr sý jiberýdi uıǵaryp otyr. Bul ótken jylmen salystyrǵanda 33,3 mln tekshe metrge kóp.
Qanysh Sátbaev atyndaǵy sý arnasy bıyl Shiderti ózeniniń mańaıyn qonys etken eldi mekenderdi barynsha jarylqaıyn dep tur. Tirshilik nári saı-salany sýǵa toltyryp, Aqtoǵaı aýdany men Ekibastuzdyń aýyldyq aımaqtaryndaǵy mal ósirýshi aǵaıynnyń nesibesin eseleı túsedi.
Kanaldan sý bosatý sharalarynyń jalpy uzaqtyǵy shamamen eki aıǵa ulasady. Osy aralyqta jalpy kólemi 120 mln tekshe metr sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı balansyn ustap turýǵa, ekologııalyq ahýaldy jaqsartýǵa negizdelgen.
— Bıyl Shiderti ózeniniń jaıylmasyna 120 mln tekshe metr kóleminde sý jiberiledi. Ol shamamen sáýir-mamyr aılarynda júrgiziledi. 2024 jyly bosatylǵan sýdyń kólemi 86,7 mln tekshe metrdi quraǵan. Tasqyn sýlardyń kedergisiz ótýin qamtamasyz etý maqsatynda ótken jyldyń qazan-qarasha aılarynda Ertis basseındik ınspektsııasymen, tótenshe jaǵdaılar organdarymen jáne jergilikti ózin-ózi basqarý organdarynyń qyzmetkerlerimen birlesip, barlyq gıdrotehnıkalyq qurylysqa komıssııalyq zertteý júrgizildi. Gıdrotehnıkalyq qurylystyń jaǵdaıy qanaǵattanarlyq, - dep habarlady Kazinform tilshisine QR Sý resýrstary jáne ırrıgatsııa mınıstrligi «Qazsýshar» RMK Pavlodar fılıalynyń basshysy Arman Ospanov.
Atap óteıik, «Qazsýshar» mekemesiniń Pavlodardaǵy fılıalyna búginde Shiderti saǵalyq sýarý júıesi, Belovod toptyq sý qubyry, Maı toptyq sý qubyry, Ertis júıeli sýarmaly óndiristik ýchaskesi, Qolybaı kóltabandar júıesi qaraıdy.
Byltyr Aqmola oblysynyń kásipkeri Óleńti ózenin bógep, saldarynan Pavlodar óńiriniń 80 sharýasy sýsyz, Aqkól-Jaıylma nýsyz qalǵanyn jazǵan edik.