Bıyl Sátbaev kanalynan Shiderti alqabyna qansha sý jiberiledi
PAVLODAR. KAZINFORM - «Qazsýshar» RMK Qanysh Sátbaev atyndaǵy kanaldan Shiderti ózenine 120 mln tekshe metr sý jiberýdi uıǵaryp otyr. Bul 2024 jylmen salystyrǵanda 33,3 mln tekshe metrge kóp.
Qanysh Sátbaev atyndaǵy sý arnasy bıyl da Shiderti ózeniniń mańaıyn qonys etken eldi mekenderdi barynsha jarylqaıyn dep tur. Tirshilik nári saı-salany sýǵa toltyryp, Aqtoǵaı aýdany men Ekibastuzdyń aýyldyq aımaqtaryndaǵy mal ósirýshi aǵaıynnyń nesibesin eseleı túsedi dep kútilip otyr.
- QR Sý resýrstary jáne ırrıgatsııa mınıstrligi tarapynan Shiderti ózeniniń jaıylmasyna 120 mln tekshe metr sý jiberý josparlandy. Tabıǵatty qorǵaý maqsatyndaǵy is-shara bıyl sáýir – mamyr aılarynda júzege asyrylady. 2025 jyly sý jiberý kólemi de dál osyndaı bolǵan edi, - dep habarlady Kazinform tilshisine «Qazsýshar» RMK Pavlodar fılıalynyń dırektory Arman Ospanov.
Onyń sózinshe, kóktemgi sý tasqyny kezinde yqtımal tótenshe jaǵdaılardyń aldyn alý maqsatynda arnaıy jospar bekitilgen. Eki beket uıymdastyrylady (Ekibastuz qalasynyń aýyldyq aımaǵyndaǵy Myńtomar aýyly jáne Aqtoǵaı aýdanyndaǵy Qaraqoǵa aýyly). 1 naýryzdan bastap táýlik boıy kezekshilik kestesi uıymdastyrylyp, tótenshe jaǵdaılar organdarymen jáne jergilikti atqarýshy organdarmen baılanys ornatylady. Janar-jaǵarmaı qory jasaqtalǵan, 11 arnaıy tehnıka daıyn tur. Fılıaldyń barlyq nysandary qanaǵattanarlyq jaǵdaıda dep baǵalanyp otyr jáne sý tasqyny kezeńinde eldi mekenderdi sý basý qaýpin týdyrmaıdy.
- Kanaldan sý bosatý sharalarynyń jalpy uzaqtyǵy eki aıǵa ulasyp, sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı balansyn ustap turýǵa, ekologııalyq ahýaldy jaqsartýǵa negizdelgen, - dep qosty Arman Ospanov.
Búginde «Qazsýshardyń» jergiliktiń fılıalynyń balansynda Shiderti lımandy sýarý júıesi men Maı toptyq sý qubyry, sondaı-aq Jelezın jáne Maı aýdandaryndaǵy turaqty sýarý boıynsha Prıırtysh jáne Maıtúbek óndiristik ýchaskeleri bar.
Eske sala keteıik, byltyr Sátbaev kanalynan Shiderti ózeni jaıylmasyna rekordyq kólemde sý jiberilgen bolatyn.