Bıyl saqtandyrý sektorynyń aktıvteri 3,8 trln teńgege jetti

ASTANA. KAZINFORM — 2025 jylǵy toǵyz aıdyń qorytyndysy boıynsha Qazaqstannyń saqtandyrý naryǵy turaqty ósim kórsetip otyr. Sektor aktıvteri 3,8 trln teńgege jetip, jyl basynan beri 20%-ǵa artty. Ósimniń negizgi qozǵaýshy kúshi – ómirdi saqtandyrý jáne erikti saqtandyrý túrleri. Saqtandyrý sharttarynyń sany 18,8 mıllıonnan asyp, naryq qatysýshylarynyń taza paıdasy 222 mlrd teńgeni qurady. Bul týraly Qarjy naryǵyn retteý jáne damytý agenttigi málim etti.

2025 jylǵy 1 qazandaǵy málimet boıynsha, elde 25 saqtandyrý kompanııasy jumys isteıdi. Olardyń ony – ómirdi saqtandyrýmen aınalysady.

Qyrkúıek aıynyń qorytyndysynda saqtandyrý uıymdarynyń jalpy aktıvteri 3,8 trln teńgege jetti. Bul ótken aımen salystyrǵanda 2%-ǵa, al jyl basynan beri 20%-ǵa kóp. Mundaı ósim negizinen saqtandyrý qyzmetinen túsken tabys pen baǵaly qaǵazdarǵa salynǵan ınvestıtsııalar esebinen boldy.

Aktıvterdiń kóp bóligi (71,5%) baǵaly qaǵazdarǵa tıesili. Sondaı-aq bankterdegi depozıtter 8,4%, al saqtandyrý kompanııalaryna qaryzdar 4,1% úles alady.

Saqtandyrý kompanııalarynyń mindettemeleri 2,6 trln teńgege jetip, 1,5%-ǵa artty. Al olardyń menshikti kapıtaly 1,1 trln teńgege deıin ósip, 3,2%-ǵa kóbeıdi.

2025 jyldyń qyrkúıeginde saqtandyrý sektorynyń taza paıdasy 33,5 mlrd teńge boldy. Al jyl basynan beri jalpy paıda 222 mlrd teńgege jetti.

Jeke jáne zańdy tulǵalar arasynda jasalǵan saqtandyrý sharttarynyń sany 18,8 mıllıonǵa jetti. Bul ótken jylmen salystyrǵanda 11%-ǵa kóp. Eń úlken ósim ómirdi saqtandyrý salasynda baıqaldy — ol eki esege artqan.

Jyl basynan beri saqtandyrý syılyqaqylarynyń jalpy kólemi 1,2 trln teńgeni qurady. Bul ótken jylmen salystyrǵanda 13%-ǵa joǵary. Ósimniń basym bóligi erikti jeke jáne múliktik saqtandyrý túrlerine tıesili.

Mysaly, ómirdi saqtandyrý men zeınetaqy annýıtetteri boıynsha jınalǵan syılyqaqylardyń kólemi 9–17%-ǵa artqan. Al múlikti erikti saqtandyrý boıynsha ósim shamamen 20%-dy qurady.

Mindetti saqtandyrý túrlerinde de ósim bar: bıyl 201,5 mlrd teńge kóleminde syılyqaqy jınaldy, bul ótken jylmen salystyrǵanda 7%-ǵa kóp. Ásirese kólik ıeleriniń azamattyq jaýapkershiligin saqtandyrý belsendi damyp keledi — bul baǵyttaǵy syılyqaqylar 18%-ǵa ósken.

Saqtandyrý tólemderiniń kólemi de kóbeıdi. Qyrkúıek aıynda kompanııalar 37,7 mlrd teńge tóledi, al jyl basynan beri tólemderdiń jalpy somasy 319,7 mlrd teńgege jetti. Bul ótken jylmen salystyrǵanda shamamen 37%-ǵa artyq.

Eske sala keteıik, buǵan deıin elimizde jer úıdi tótenshe jaǵdaıdan saqtandyrý mindetteletini Úkimette kóterildi.