Bıyl respýblıkalyq joldarda uıaly baılanys sapasyn jaqsartý jumystary bastalady
ASTANA. KAZINFORM – Elimizdiń respýblıkalyq jáne oblystyq mańyzy bar joldarynda uıaly baılanys sapasyn jaqsartý úshin 487 antenna-dińgekti qurylys salynady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrliginiń Telekommýnıkatsııalar komıteti Tirkelgen baılanys jobalaryn monıtorıngileý jáne damytý basqarmasynyń basshysy Azamat Seriktaev aıtty.
- «Qoljetimdi ınternet» jobasy aıasynda respýblıkalyq mańyzy bar jáne negizgi oblystyq avtomobıl joldaryn sapaly baılanyspen jáne ınternetpen qamtý jobasy bekitilgen. Búginde jergilikti atqarýshy organdarmen birlesip, respýblıkalyq mańyzy bar avtomobıl joldarynda 243 núkte anyqtaldy. Bul – baılanys joq núkteler, - dedi basqarma basshysy Ortalyq kommýnıkatsııalar qyzmetindegi brıfıngte.
Onyń málimetinshe, jergilikti atqarýshy organdarmen atalǵan oryndarda antenna-dińgekti qurylys salý úshin jobalaý-smetalyq qujattama daıyndaý jumystary qolǵa alynǵan. Búginde 110-nan astam jobalyq-smetalyq qujattama boıynsha saraptamanyń oń qorytyndysyn aldy.
- Bul jumys 2027 jyldyń sońyna deıin aıaqtalady. Birinshi kezeńde respýblıkalyq mańyzy bar joldar, ekinshi kezeńde negizgi oblystyq avtomobıl joldary qamtylady. Jalpy, respýblıka boıynsha joldardyń boıynda 487 antenna-dińgekti qurylys salynady. Respýblıkalyq joldarda dińgekterdi ornatý jumysy bıyl bastalady, al 2026 jyldan bastap negizgi oblystyq joldarǵa kóshý josparlanǵan, - dedi Azamat Seriktaev.
Buǵan deıin elimiz ınternet jyldamdyǵy boıynsha álemdik reıtıngte kórsetkishin joǵarylatqanyn jazǵan edik.