Bıyl respýblıkalyq jedel-qutqarý jasaǵy 519 ret kómekke shyqty
ASTANA. KAZINFORM — Bıylǵy jyl respýblıkalyq jedel-qutqarý jasaǵy úshin qarbalas, ári jaýapty jyl boldy. Olar jyl basynan beri 519 ret jedel kómekke shyqty. Bul týraly QR TJM baspasóz qyzmeti habarlady.
Qazaqstan TJM respýblıkalyq jedel-qutqarý jasaǵy jetýi qıyn jerlerde jáne qaýipti jaǵdaılarda asa kúrdeli mindetterdi oryndaýdy jalǵastyryp keledi.
Qutqarýshylar 500-den astam jedel shaqyrtýda 203 adamdy qutqardy. Onyń 35-i bala.
Jedel áreket etý tıimdiligin arttyrý maqsatynda Kishi Almaty shatqalynda qutqarý beketi ashyldy. Onyń jumysy barysynda mamandar 56 tótenshe jaǵdaıǵa jedel áreket etip, 68 adamdy, onyń ishinde 6 balany qutqardy.
Boroldaı áýejaıynda áýe kóligin paıdalana otyryp, tótenshe jaǵdaılarǵa jedel áreket etýge baǵyttalǵan taǵy bir qutqarý beketi ashyldy. Esepti kezeńde izdestirý-qutqarý jumystaryn júrgizý úshin 4 ret áýege kóterildi, nátıjesinde 3 adam qutqaryldy.
Respýblıkalyq jedel-qutqarý jasaǵynyń qutqarýshylary tek Qazaqstan Respýblıkasynyń azamattaryna ǵana emes, sheteldik týrısterge de kómek kórsetedi. Іle Alataýynyń jetýi qıyn aýdandarynda Reseı Federatsııasy, Qytaı Halyq Respýblıkasy, Vetnam jáne Úndistan azamattaryn qutqarý operatsııalary sátti júrgizildi.
— Búginde respýblıkalyq jedel-qutqarý jasaǵy 101 joǵary bilikti mamannan quralǵan uıymshyl komanda. Jasaq quramynda alpınıster, súńgýirler, kınologtar, radıatsııalyq, hımııalyq jáne bıologııalyq qorǵaý mamandary, sondaı-aq medıtsınalyq psıhologtar men dıspetcherler qyzmet atqarady. Olardyń árqaısysynyń kásibı daıyndyq deńgeıi joǵary, dene bitimi shymyr, kúızeliske tózimdi, qysyltaıań jaǵdaılardaǵy jumys tájirıbesi bar. Qutqarý operatsııalary kóbine birneshe saǵatqa, keıde tipti táýlikterge sozylady — mundaı jaǵdaıda qateliktiń quny tym joǵary, — delingen aqparatta.
Aıta keteıik, Almatylyq qutqarýshylar bir túnde 100-ge jýyq adamdy qutqardy.